पूर्वप्रधान न्यायाधीश चोलेन्द्र शमशेर जबराका छोरा सचिन्द्रले शान्ति सुरक्षा माग गर्दै निवेदन दिएका छन्।
उनले काठमाडौं उपत्यका प्रहरी कार्यालय रानीपोखरीमा निवेदन दिएका हुन्।
आइतबारको दिएको निवेदनमा आवश्यक शान्ति सुरक्षाको व्यवस्था गर्न माग गरिएको छ।
‘मेरो विगतमा राज्यका अंगहरूमा वहन गरेका जिम्मेवारी, राज्यको न्याय पालिकाको प्रमुखको हैसियतमा सम्पादन गरेका न्यायिक निर्णय लगायतको कारण पनि म माथि थप असुरक्षाको महसुस भएको छ,’ चोलेन्द्रको तर्फबाट सचिन्द्रले भनेको पत्रमा उल्लेख छ।
त्यसकारण थप सुरक्षा उपलब्ध गराउन निवेदन दिएको पनि उल्लेख छ।
काठमाडौं उपत्यका प्रहरी कार्यालय रानीपोखरीका डिआइजी गोविन्द थपलियाले निवेदन आएको पुष्टि गरे।
उक्त निवेदन पछि आफूहरूले सादा पोशाकमा प्रहरी परिचालन गरेको पनि बताए।
‘सुरक्षा माग गर्नुभएको थियो। त्यसअनुसार सादा पोशाकमा प्रहरी परिचालन गरिसकेका छौं,’ उनले भने।
प्रहरीले बाँसबारीस्थित निवासबाट पूर्वप्रधानन्यायाधीश जबरालाई सुरक्षा थ्रेट भएको बताउँदै मध्यराति घरबाट नियन्त्रणमा लिएर टेकुस्थित काठमाडौं उपत्यका अपराध अनुसन्धान कार्यालयमा पुर्याएको थियो।
१० घण्टा नियन्त्रणमा राखेपछि प्रहरीले उनलाई परिवारको जिम्मा लगाएर घर पठाएको थियो।
प्रहरीले यस विषयमा ‘सुरक्षा थ्रेट’ देखिएकाले ल्याइएको र पक्राउ नगरिएको दाबी गर्दै आएको छ।
तर कोबाट के खालको थ्रेट आएको थियो भन्ने कुरा प्रहरीले बताएको छैन। थ्रेट दिने व्यक्तिलाई पनि प्रहरीले पक्राउ गर्न सकेको छैन।
-1788334994.jpg)
