नवलपरासी (बर्दघाट सुस्ता पूर्व) को कावासोतीमा शंकास्पद वस्तु काट्ने क्रममा पड्किँदा दुई जना घाइते भएका छन्।
सोमबार बिहान कावासोती नगरपालिका–८ थकाली चोकमा उक्त वस्तु पड्किएको हो।
प्रहरीका अनुसार मध्यबिन्दु नगरपालिका–३ ब्रह्मस्थानका ४९ वर्षीय एकासी बोटेले अकावासोती नगरपालिका–१७ अमलटारीघाटस्थित नारायणी नदीको किनारमा उक्त वस्तु फेला पारेका थिए।
बाहिर डोरीजस्तो वस्तुले बेरिएको, भित्र फलामजस्तो देखिने र बेलनाकार आकारको उक्त वस्तु करिब दुई फिट लामो तथा १४ इन्च गोलाइको रहेको प्रहरीले जनाएको छ।
बोटेले उक्त वस्तु घरमा ल्याएका थिए। त्यसपछि भारतको मोतिहारी घर भई हाल कावासोती नगरपालिका–८ थकाली चोकमा बस्दै आएका २८ वर्षीय सचिन कुमारसँग मिलेर बिहान करिब ११:२० बजे हेक्सा ब्लेडले काट्ने क्रममा उक्त वस्तु अचानक पड्किएको थियो।
वस्तु पड्किँदा बोटे र कुमार दुवै घाइते भएका छन्। उनीहरूलाई उपचारका लागि मध्यबिन्दु प्रादेशिक अस्पताल, डण्डा लगिएको थियो। दुवैको अवस्था मध्यम रहेको प्रहरीले जनाएको छ।
उक्त वस्तु के थियो र कसरी पड्कियो भन्ने विषयमा थप अनुसन्धान भइरहेको प्रहरीले जनाएको छ।
