साउदी अरबले राजधानी रियादस्थित विमानस्थलमा क्षेप्यास्त्र र ड्रोनको आक्रमण रोक्न नसकेको विषयमा अनुसन्धान थालेको छ।
इरानसमर्थित हुथी विद्रोहीले प्रहार गरेका क्षेप्यास्त्र र ड्रोन साउदी अरबको हवाई सुरक्षा प्रणाली छल्दै किङ खालिद अन्तर्राष्ट्रिय विमानस्थलसम्म पुगेपछि आफ्नो हवाई रक्षा प्रणालीले आक्रमण रोक्न नसकेको र समयमै पूर्वसूचना दिन नसकेको विषयमा अनुसन्धान थालेको एसोसिएटेड प्रेस (एपी) ले जनाएको छ।
प्रारम्भिक अनुसन्धानमा हुथी विद्रोहीले सुरूमा धेरैवटा ड्रोन प्रहार गरेको र त्यसपछि क्रुज तथा ब्यालिस्टिक क्षेप्यास्त्रबाट रियादको किङ खालिद अन्तर्राष्ट्रिय विमानस्थललाई निशाना बनाएको देखिएको बताएका छन्।
रोयटर्सका अनुसार साउदी अरबले आक्रमणको जोखिम बढिरहेका बेला सर्वसाधारणलाई दिँदै आएको सैन्य आक्रमणसम्बन्धी पूर्वसूचना जारी गर्न बन्द गरेको थियो। गत एक सातामा रियादमा भएका चारवटा आक्रमणअघि सूचना जारी नगरिएपछि सरकारको पूर्वसूचना प्रणाली र नागरिकको सुरक्षाबारे प्रश्न उठेको छ।
साउदी अरबले गत मे महिनादेखि मोबाइल फोन र सामाजिक सञ्जालमार्फत सम्भावित आक्रमणको चेतावनी दिने राष्ट्रिय प्रारम्भिक सूचना प्रणाली सञ्चालनमा ल्याएको थियो। तर, हुथी विद्रोहीका आक्रमण बढिरहेका बेला पनि उक्त प्रणालीबाट पूर्वसूचना आउन बन्द भएको थियो।
रोयटर्सका अनुसार साउदी सिभिल डिफेन्सको एक्स खातामा उपलब्ध विवरणअनुसार गत साताको आक्रमणअघि सेप्टेम्बर २९ मा दक्षिणी प्रान्त नजरानका लागि अन्तिमपटक पूर्वसूचना जारी गरिएको थियो। त्यसपछि रियादमा शृंखलाबद्ध आक्रमण हुँदा पनि सर्वसाधारणलाई चेतावनी दिइएन।
सोमबार साउदी सिभिल डिफेन्सले सेप्टेम्बर २९ पछि पहिलोपटक पूर्वसूचना जारी गर्दै रियाद तथा दक्षिणी सहरहरूमा सम्भावित खतराबारे सचेत गराएको थियो।
साउदी सिभिल डिफेन्स र सरकारको सञ्चार कार्यालयले पूर्वसूचना किन रोकिएको थियो भन्नेबारे रोयटर्सले पठाएका प्रश्नको जवाफ दिएका छैनन्।
हुथी विद्रोहीले प्रहार गरेका क्षेप्यास्त्र र ड्रोन एक हजार किलोमिटरभन्दा बढी दूरी पार गरेर रियाद पुगेका थिए। त्यसैले आक्रमण रोक्न नसक्नु र समयमै पूर्वसूचना दिन नसक्नु दुवै विषय साउदी अरबको अनुसन्धानको दायरामा परेका छन्।
विमानस्थलमा भएका शृंखलाबद्ध आक्रमणबाट कम्तीमा १८ जनाको मृत्यु र ३०० भन्दा बढी घाइते भएको रोयटर्सले जनाएको छ।
साउदी अरबका ऊर्जा मन्त्री राजकुमार अब्दुल अजिज बिन सलमानले सोमबार रियादमा आयोजित विश्व पेट्रोलियम ऊर्जा सम्मेलनमा पछिल्ला घटनालाई गम्भीर बताएका थिए।
‘पछिल्ला साताहरूका घटनाहरू गम्भीर छन्। हाम्रो प्रतिक्रिया पनि त्यत्तिकै गम्भीर हुनुपर्छ,’ उनले भने।
अमेरिका र इसराइलले इरानविरूद्ध युद्ध सुरू गरेपछि मध्यपूर्वमा फैलिएको द्वन्द्वका क्रममा खाडी क्षेत्रका देशहरू पनि इरानी ड्रोन र क्षेप्यास्त्रको निशानामा पर्दै आएका छन्। फेब्रुअरीमा अमेरिका र इरानबीच युद्ध सुरु भएयता खाडी क्षेत्रका सबै देशले इरानी ड्रोन र क्षेप्यास्त्र आक्रमणको सामना गरेका छन्।
कतारले प्रायः हरेक आक्रमणअघि मोबाइल फोनमा सूचना पठाउने गरेको छ भने बहराइन र कुवेतले पनि सर्वसाधारणलाई सुरक्षित स्थानमा जान आग्रह गर्दै साइरन बजाउने गरेका छन्।
(विभिन्न सञ्चार माध्यममा प्रकाशित समाचारमा आधारित।)
