केन्याका विश्वप्रसिद्ध धावक इलिउड किप्चोगेले ४१ वर्षको उमेरमा पनि आफ्नो उत्कृष्ट प्रदर्शनलाई निरन्तरता दिएका छन्।
उनले आइतबार अस्ट्रेलियामा भएको मेलबर्न म्याराथन जित्दै प्रतियोगिताको निर्धारित मार्गमा अहिलेसम्मकै उत्कृष्ट समयको कीर्तिमान बनाएका छन्।
दुई पटकका ओलम्पिक म्याराथन च्याम्पियन किप्चोगेले ४२.१९५ किलोमिटरको म्याराथन दौड दुई घण्टा ९ मिनेट १० सेकेन्डमा पूरा गरे। यो उनको म्याराथन करियरको १७औँ जित हो। सन् २०२३ मा बर्लिन म्याराथन जितेयता उनले पहिलो पटक म्याराथनको उपाधि जितेका हुन्।
‘मेरो शरीर अझै उत्कृष्ट लयमा छ। म नयाँ पुस्ताका धावकहरूसँग प्रतिस्पर्धा गर्न अझै सक्षम छु,’ किप्चोगेले जितपछि भने।
उनले थपे, ‘म उमेरले सबैभन्दा पाको धावक हुँ, तर नयाँ पुस्ताका धावकहरूसँग दौडिन पाउँदा खुसी छु।’
मेलबर्न म्याराथनको केही भाग अस्ट्रेलियाको चर्चित फर्मुला वान कार रेस हुने अल्बर्ट पार्कको ट्र्याकमा सञ्चालन गरिएको थियो। दौडको अन्त्य भने प्रसिद्ध मेलबर्न क्रिकेट ग्राउन्ड (एमसीजी) भित्र गरिएको थियो।
किप्चोगेले एमसीजीमा प्रवेश गरेपछि समर्थकहरूलाई हात हल्लाउँदै अभिवादन गरेका थिए।
‘दौडको मार्ग निकै सुन्दर थियो। मानिसहरू उभिएर मेरो नाम लिँदै चिच्याइरहेका र हौसला दिइरहेका थिए। त्यो अनुभव साँच्चिकै रमाइलो थियो,’ उनले भने।
फर्मुला वानको ट्र्याकमा दौडिनु र अन्त्यमा क्रिकेट मैदानभित्र पुगेर दौड पूरा गर्नु आफ्ना लागि फरक अनुभव भएको उनले बताए। नयाँ पुस्ताका धावकहरूसँग प्रतिस्पर्धा गर्दै मेलबर्नको दौड समुदायलाई प्रेरित गर्न पाउँदा गर्व लागेको पनि उनले उल्लेख गरे।
पुरुषतर्फ अस्ट्रेलियाका थोमस डो कान्टो दुई घण्टा १० मिनेट ३५ सेकेन्डमा दौड पूरा गर्दै दोस्रो भए। अस्ट्रेलियाकै रिस एडवर्ड्स तेस्रो स्थानमा रहे।
महिलातर्फ न्युजिल्यान्डकी क्यामिल फ्रेन्चले दुई घण्टा २८ मिनेट २५ सेकेन्डमा दौड पूरा गर्दै उपाधि जितिन्। अस्ट्रेलियाकी सिनेड डाइभर दोस्रो र आयरल्यान्डकी निकोला शेरिडन तेस्रो भए।
सातै महादेशमा म्याराथन दौडने लक्ष्य
मेलबर्न म्याराथन किप्चोगेको विश्व भ्रमणअन्तर्गत तेस्रो म्याराथन हो। उनले दुई वर्षभित्र अन्टार्कटिकासहित विश्वका सातै महादेशमा म्याराथन दौड पूरा गर्ने लक्ष्य राखेका छन्।
यस अभियानबाट संकलित रकम इलिउड किप्चोगे फाउन्डेसनलाई प्रदान गरिनेछ। उक्त संस्थाले शिक्षा, वातावरणीय दिगोपन र स्वास्थ्यका क्षेत्रमा काम गर्छ।
किप्चोगेलाई विश्वकै महान् लामो दूरीका धावकमध्ये एक मानिन्छ। उनले म्याराथनमा दुई ओलम्पिक स्वर्ण जितेका छन्। त्यस्तै, पाँच हजार मिटर दौडमा एक रजत र एक कांस्य ओलम्पिक पदक पनि जितेका छन्।
उनको उपलब्धिमा विश्व च्याम्पियनसिपको उपाधि, विश्व म्याराथन मेजर प्रतियोगितामा १२ जित र म्याराथनमा दुई आधिकारिक विश्व कीर्तिमान पनि समावेश छन्।
सन् २०१९ मा अस्ट्रियाको भियनामा विशेष परिस्थितिमा दौडिँदै किप्चोगेले म्याराथन दुई घण्टाभन्दा कम समयमा पूरा गर्ने पहिलो व्यक्ति बनेका थिए। उनले उक्त दौड एक घण्टा ५९ मिनेट ४० सेकेन्डमा पूरा गरेका थिए। यद्यपि, विशेष परिस्थितिमा गरिएको उक्त दौडलाई आधिकारिक विश्व कीर्तिमानका रूपमा मान्यता दिइएको थिएन।
