जय ट्रफी एलिट कप बहुदिवसीय क्रिकेट प्रतियोगिताअन्तर्गत दोस्रो चरणका खेल सकिदा नेपाल पुलिस क्लब शीर्ष स्थानमा छ।
बिहीबार दोस्रो खेलमा मधेश प्रदेशलाई पराजित गरेसँगै २५ अंक जोडेको पुलिसको दुई खेलबाट ४० अंक छ।
यता दोस्रो खेलमा बागमती प्रदेशसँग बराबरी खेलेको त्रिभुवन आर्मी क्लब ३० अंक जोडेर दोस्रो स्थानमा उक्लिएको छ। दोस्रो खेलबाट आर्मीले १६ अंक जोडेको हो।
बागमती अंक तालिकाको तेस्रो स्थानमा छ। बागमतीले दोस्रो खेलबाट १३ अंक जोडेर कुल २८ अंक बनाएको छ।
यता मधेशले भने दोस्रो खेलबाट ६ अंक मात्र बटुल्न सक्यो। अघिल्लो खेलबाट १५ अंक जोडेको मधेश २१ अंकसहित पुछारमा छ।
प्रतियोगिताको निमयअनुसार एक विकेटको ०.५ अंक हुनेछ भने २५ रन बराबर ०.५ अंक प्राप्त हुने व्यवस्था छ।
यस्तै बराबरी भएको अवस्थामा पहिलो इनिङग्समा अग्रता लिएको टोलीलाई ७ बोनस अंक र पछि परेको टोलीलाई ३ बोनस अंक पाउने प्रावधान छ। यस्तै खेल बराबरी भएमा दुवै टोलीले १-१ अंक बोनस पाउने व्यवस्था छ। यस्तै पहिलो इनिङग्समा अग्रता लिएको टोलीले खेल जितेमा १० अंक पाउने नियम छ।
