आइसिसी यू-१९ विश्वकप २०२६ अन्तर्गत एसिया छनोटको तयारीमा रहेको नेपाली यू-१९ टोलीलाई अफगानिस्तानले ३०१ रनको बलियो लक्ष्य दिएको छ।
मुलपानी मैदानमा टस जितेर पहिले ब्याटिङ गरेको अफगानिस्तानले तीन खेलको सिरिजको पहिलो खेलमा ९ विकेटको क्षतिमा ३०० रन बनायो।
अफगानिस्तानका लागि फैसल खानले ८८ बलमा ९७ रन जोडे। यस्तै खालिद अहमादजाइ १०७ बलमा ७६ रन बनाए। बर्कत इब्राइहिमजाइले २६ बलमा ३५ रनको योगदान गरे।
बलिङमा नेपालका सन्तोष यादवले ३ विकेट लिए। उनले १० ओभरमा ६४ रन खर्चिए। अभिषेक तिवारीले २ विकेट हात पारे।
विश्वकप छनोटको तयारीका लागि दिल्लीसँग तीन खेलको सिरिज खेलेपछि नेपालले अफागानिस्तानसँग पनि तीन खेलको सिरिज खेलेको हो।
नेपालले आगामी चैत अन्तिम सातादेखि आइसिसी यू-१९ विश्वकपअन्तर्गत एसिया छनोट आयोजना गर्दैछ।
एसिया छनोटमा आयोजक नेपालसहित पाँच टोलीले भाग लिँदैछन्। नेपाल, अफगानिस्तान, युएई, हङकङ र ओमानले छनोटमा प्रतिस्पर्धा गर्दैछन्।
नेपाल, अफगानिस्तान र युएईले सिधा छनोट खेल्दा हङकङ र ओमानले छनोट पार गरेका हुन्।
यो छनोटको विजेता मात्र सन् २०२६ मा जिम्बावे र नामिबियामा हुने आइसिसी यू-१९ विश्वकपमा छनोट हुनेछ।
नेपालले गत वर्ष दक्षिण अफ्रिकामा भएको विश्वकप खेलेको थियो। त्यसअघि नेपालले २००० देखि २००८ सम्म लगातार पाँचपटक विश्वकप खेलेको थियो। सन् २०१२ र २०१६ मा पनि खेल्दै नेपालले अहिलेसम्म आठ पटक युवा विश्वकप खेलिसकेको छ।
-1742801159.jpg)
