सन् २०२६ मा जापानको आइची–नागोयामा आयोजना हुने २०औँ एसियाली खेलकुदमा क्रिकेटले निरन्तरता पाउने भएको छ।
अप्रिल २८ मा नागोया सिटी हलमा बसेको आयोजक समितिको ४१औँ सञ्चालक समिति बैठकले दुई नयाँ खेललाई औपचारिकरूपमा अनुमोदन गरेको हो।
जसमा क्रिकेट र मिक्स्ड मार्शल आर्ट्स रहनेछन्। मिक्स्ड मार्शल आर्ट्समा पहिलोपटक एशियाली खेलकुदमा प्रस्तुत हुँदैछ, जसमा ६ इभेन्ट रहनेछन्। यो खेल कम्ब्याट स्पोर्ट्स अन्तर्गत कुराश र जुजुत्सु सँगै समावेश हुनेछ।
क्रिकेटको खेल स्थल आइची प्रान्तमै रहनेछ। तर स्थान भने तोकिएको छैन। दक्षिण एसियामा यसको लोकप्रियता र सन् २०२८ को लस एन्जलस ओलम्पिकमा समावेश हुने टी-२० फर्म्याटले यसतर्फ विशेष ध्यान तानिएको छ। सन् १९०० को पेरिस ओलम्पिकपछि पहिलोपटक क्रिकेट ओलम्पिकमा फर्कने तयारीमा छ।
यसअघि चीनको हान्झाउमा भएको १९औं एसियाली खेलकुदमा क्रिकेटमा पनि प्रतिस्पर्धा भएको थियो। जहाँ नेपाली पुरुष टोलीले उत्कृष्ट खेल देखाएको थियो। क्वार्टरफाइनलसम्म पुगेको नेपालले भारतसँग उत्कृष्ट प्रदर्शन गरे पनि २३ रनले पराजित भएको थियो।
यता एसियाली खेलकुदको तयारीलाई तीव्र पार्दै एसियाली ओलम्पिक परिषद् (ओसिए) र आयोजक समितिले दुई महत्वपूर्ण बैठकको आयोजना गर्दैछन्। तीन दिन चल्ने यी बैठक अप्रिल ३० देखि मे २ सम्म सञ्चालन हुनेछन्।
बुधबारदेखि सुरु हुने प्रथम प्राविधिक प्रतिनिधि बैठक मे २ सम्म चल्नेछ। त्यसैबीच तेस्रो समन्वय समिति बैठक (बिहीबार र शुक्रबार गरी दुई दिनसम्म हुनेछ।
सन् २०२६ सेप्टेम्बर १९ देखि अक्टोबर ४ सम्म चल्ने खेलकुदमा एशियाली ओलम्पिक परिषद्का ४५ सदस्य मुलुकका १५ हजार खेलाडी तथा अफिसियल सहभागी हुनेछन्। ४१ खेल समावेश हुने यस प्रतियोगिता एशियाली इतिहासमै सबैभन्दा व्यापक आयोजनामध्ये एक हुने अनुमान गरिएको छ।
तीनदिने प्राविधिक प्रतिनिधि बैठकमा करिब ३५० जनाको सहभागिता रहनेछ। यसमा ६७ जना प्राविधिक प्रतिनिधि, १२ जना अन्तर्राष्ट्रिय र एशियाली महासंघका प्रतिनिधि, ७० जना आयोजकका निर्देशक र अधिकारी, साथै विभिन्न विभागका २०० कर्मचारी रहनेछन्। बैठकको पहिलो दिन प्रस्तुति दिइनेछ भने त्यसपछि खेलस्थल अवलोकन र व्यवस्थापनसम्बन्धी ‘वान अन वान’ छलफल हुनेछ।
