आगामी जेठ तेस्रो साता स्कटल्यान्डमा हुने आइसिसी विश्वकप लिग-२ अन्तर्गत त्रिकोणात्मक एकदिवसीय सिरिज र टी-२० सिरिजअघि नेपालले इंग्ल्यान्डमा तयारी गर्ने भएको छ।
वैशाख ३१ देखि जेठ १२ गतेसम्म नेपाली टोलीले अभ्यासका क्रममा स्थानीय क्रिकेट क्लब र एमसिसीसँग अभ्यास खेलसँगै ट्रेनिङ क्याम्पमा समेत सहभागिता जनाउनेछ।
त्यसपछि स्कटल्यान्ड गएपछि नेपालले त्यहाँ स्कटल्यान्ड ए टोलीसँग दुई वटा अभ्यास खेल्नेछ।
नेपालले लिग-२ अघि कुल ६ वटा अभ्यास खेल खेल्ने कार्यक्रम छ।
लिग-२ मा नेपालले स्कटल्यान्ड र नेदरल्यान्ड्ससँग त्रिकोणात्मक सिरिज खेलेपछि यिनै टोलीसँग टी-२० सिरिज पनि खेल्नेछ।
लिग-२ को खेल जेठ १९ देखि हुनेछ भने टी-२० सिरिज असार २ देखि सुरु हुनेछ।
इंग्ल्यान्ड भ्रमण जानुअघि नेपालका प्रशिक्षक स्टुअर्ट लले ५३ खेलाडी सम्मिलित कोर क्याम्प सञ्चालन गरिरहेका छन्।
