स्कटल्यान्ड, नेपाल र नेदरल्यान्ड्सबीचको टी-२० अन्तर्राष्ट्रिय सिरिजअन्तर्गत घरेलु टोली स्कटल्यान्डमाथि नेपालले मंगलबार २ विकेटको जित निकालेको छ। सिरिजमा नेपालले पहिलो जित हात पारेको हो।
९८ रनको सामान्य लक्ष्य नेपालले पूरा गर्न अन्तिम ओभरको पाँचौ बलसम्म कुर्न पर्यो। नेपालले लक्ष्य ८ विकेटको क्षतिमा १९.५ बलमा पूरा गर्यो।
नेपालको ब्याटिङ सोचे जस्तो हुन भने सकेन। ओपनिङ ब्याटर लोकेश बम ९ रन र अनिल साह ३ रनमा आउट भएपछि नेपाललाई सुरुमै दबाब पर्यो।
त्यसपछि कप्तान रोहित पौडेल पनि ७ रनमै आउट भए। ओपनर कुशल भुर्तेल चौथो विकेटको रुपमा ३० रन जोडेर आउट भए। भुर्तेलले ३५ बल खेलेर ४ चौका प्रहार गर्न सके।
दीपेन्द्रसिंह ऐरीले १४ रन र बसिर अहमदले १३ रन बनाए। दुवैले चौका वा छक्का प्रहार गर्न भने सकेनन्। रुपेश सिंहलाई सातौं विकेटको रुपमा माइकल लिस्कले आउट गरे।
नेपाललाई अन्तिम ओभरमा जितका लागि चार रन चाहिएको थियो भने तीन विकेट बाँकी थियो। पहिलो बलमा करण केसीले सफायन सरिफविरूद्ध एक रन लिन सफल भए। दोस्रो बलमा पनि किरण ठगुन्नाले एक रन नै लिए। तेस्रो बलमा पनि एक रन भयो। तर चौथो बलमा ठगुन्ना १० रनमा आउट हुन पुगे। जसका करण नेपाललाई अन्तिम दुई बलमा एक रन चाहियो। पाँचौ बलमा सन्दीप लामिछानेले १ रन लिँदै नेपाललाई जित दिलाए।
बलिङमा स्कटल्यान्डका सरिफ र लिस्कले २-२ विकेट लिए।
ग्लास्गोमा टस जितेको नेपालले फिल्डिङ रोजेपछि पहिले ब्याटिङ गरेको स्कटल्यान्ड १९.४ ओभरमा ९७ रनमा अलआउट भयो।
स्कटल्यान्डका लागि माइकल लिस्कले सबैभन्दा बढी ४६ रन जोडे। १९औं ओभरको चौथो बलमा अन्तिम विकेटको रुपमा आउट हुनुअघि उनले ४६ बलमा ४ चौका र १ छक्का प्रहार गरे। खेलमा स्कटल्यान्डका ८ ब्याटरले दोहोरो अंकमा रन जोड्न सकेनन्।
पहिलो ओभरमै दीपेन्द्रसिंह ऐरीले ओपनिङ ब्याटर मार्क वाटलाई एक रनमा बोल्ड गरे। दोस्रो ओभरमा करण केसीले ओपनर जर्ज मुन्सीलाई ८ रनमा आउट गरेका थिए।
लगातार विकेट लिएको नेपालले मुन्सी आउट भएको अर्को बलमा लियाम नेलरलाई १ रनमा रनआउट गर्यो। उनलाई लोकेश बमले रनआउटको सिकार बनाए।
करण केसीले चौथो ओभरमा फिन्ले म्याक्रिथलाई २ रन र अर्को ओभरमा ब्रान्डन म्याकमलेनलाई ललित राजवंशीले १० रनमा क्याच गराएपछि नेपाल खेलमा हाबी भयो। यससँगै करणले टी-२० अन्तर्राष्ट्रिय क्रिकेटमा सय विकेट पूरा गरे।
सन्दीप लामिछानेले १३औं ओभर र १६औं ओभरमा २-२ विकेट गरी कुल चार विकेट लिए। सन्दीपले ४ ओभरमा ४ विकेट लिँदा १ मेडन राखे भने ११ रन मात्र खर्चिए। करण केसीको नाममा २ विकेट रह्यो। उनले ४ ओभरमा २ रन दिए। दीपेन्द्रले पनि २ विकेट लिँदा ललित राजवंशीले १ विकेट हात पारे।
सिरिजको पहिलो खेलमा भने नेपाल पराजित भयो। सोमबार राति भएको खेलमा नेपालमाथि नेदरल्यान्ड्सले सुपर ओभरमा जित निकालेको थियो। खेलमा तीन पटक सुपर ओभरमा भएको थियो।
निर्धारित २० ओभर र एक ओभरका दुई वटा सुपर ओभरका खेलमा स्कोर बराबरी भएपछि खेल तेस्रो सुपर ओभरमा पुगेको थियो।
सिरिजमा यसअघि स्कटल्यान्डले नेदरल्यान्ड्सलाई पराजित गरेको थियो।
नेपाल र स्कटल्यान्डबीच पहिलो पटक टी-२० अन्तर्राष्ट्रिय खेलमा प्रतिस्पर्धा भएको हो। नेपालले सन् २०१४ देखि टी-२० अन्तर्राष्ट्रिय खेल खेल्न थाले पनि स्कटल्यान्डसँग कहिल्यै प्रतिस्पर्धा भएको थिएन।
