अस्ट्रेलिया भ्रमणमा रहेको नेपाली राष्ट्रिय क्रिकेट टोलीलेआफ्नो अन्तिम अभ्यास खेलमा जित निकालेको छ।
साउथ अस्ट्रेलियाविरूद्ध शनिबार भएको खेलमा नेपालले २ विकेटको जित निकाल्यो।
पहिले ब्याटिङ गरेको साउद अस्ट्रेलिया ४५ ओभरमा २४२ रनमा अलआउट भयो।
उसका लागि हूगनबोइजेमले ५३ रन र ह्यारी मानेन्टीले ६३ रन बनाए।
बलिङमा नेपालका नन्दन यादव र सोमपाल कामीले ३-३ विकेट लिए। रूपेश सिंह, सन्दीप लामिछाने र शाहब अलामले १-१ विकेट लिए।
२४३ रनको लक्ष्य नेपालले ४४.१ ओभरमा ८ विकेटको क्षतिमा पूरा गर्यो। नेपालको जितमा कप्तान रोहितकुमार पौडेलले शतक प्रहार गरे। उनले नटआउट १०१ रन बनाए। गुल्सन झाले ३६ रन र सोमपाल कामीले नटआउट ४० रन बनाए।
यसअघि नेपालले बिहीबार खेलिएका दुई वटा टी-२० अभ्यास खेलमा पराजय भोगेको थियो। नेपाललाई साउथ अस्ट्रेलियाले दुई अभ्यास खेलमा पराजित गरेको थियो। यस्तै नेपालले मंगलबार एसिटी अस्ट्रेलियाविरूद्धको दुवै अभ्यास खेलमा जित निकालेको थियो।
यसअघि टप एन्ड सिरिज खेलेको नेपालले अब स्वदेश फर्कनेछ। स्वदेश फर्किएपछि नेपाली टोलीले युएईमा वेस्ट इन्डिजसँग तीन खेलको टी-२० सिरिज खेल्दैछ। त्यसपछि नेपाली टोली विश्वकप छनोट खेल्ने ओमान जानेछ।
विश्वकप छनोटमा नेपालसहित नौ टोलीले भाग लिँदैछन्। शीर्ष तीन टोली अर्को वर्ष भारतमा हुने विश्वकपमा पुग्नेछन्।
नेपाली टोलीः रोहित पौडेल (कप्तान), दीपेन्द्रसिंह ऐरि (उप-कप्तान), सन्दीप लामिछाने, कुशल भुर्तेल, आसिफ सेख, कुशल मल्ल, गुलशन झा, आरिफ सेख, भीम सार्की, रुपेस कुमार सिंह, सोमपाल कामी, नन्दन कुमार यादव, करण के सी, रिजन ढकाल, लोकेस बम, साहब आलम।
-1756544830.jpg)
-1746009348.jpg)
