दिल्ली क्यापिटल्सका ब्याटर डेभिड मिलरले रोयल च्यालेन्जर्स बेंगलुरुविरुद्धको खेलमा अन्तिम ओभरमा विष्फोटक ब्याटिङ गर्दै आफ्नो टोलीलाई सनसनीपूर्ण जित दिलाएका छन्।
१० दिनअघि गुजरात टाइटन्सविरुद्धको खेलमा अन्तिम २ बलमा २ रन चाहिएको बेला टिमलाई जिताउन नसकेका मिलरले यो खेलमार्फत त्यसको 'भर्पाई' गरेका हुन्।
खेल जित्न दिल्लीलाई अन्तिम ओभरमा १५ रन चाहिएको थियो। रोमारियो शेफर्डले बलिङ गरेको पहिलो दुई बलमा मात्र २ रन आएपछि खेल झन् तनावपूर्ण बन्यो। दिल्लीलाई ४ बलमा १३ रन आवश्यक थियो। तर, मिलरले अर्को तीन बलमा लगातार छक्का, छक्का र चौका प्रहार गर्दै एक बल बाँकी छँदै दिल्लीलाई जित दिलाए।
खेलपछि मिलरले भने, ‘अघिल्लो खेलमा जित दिलाउन नसक्दा म निकै दुःखी थिएँ। त्यो हार सधैं मनमा खेलिरहन्थ्यो, तर आज जिताउन पाउँदा निकै खुसी लागेको छ।’ उनले सुरुका केही बलमा संघर्ष गरे पनि अर्का ब्याटर ट्रिस्टन स्टब्सको हौसलाले आफूलाई 'फोकस' हुन मद्दत गरेको बताए।
पहिले ब्याटिङ गरेको आरसीबीले १७५ रन बनाएको थियो। उसका लागि फिल साल्टले ६३ रन बनाए भने विराट कोहली १९ रनमा आउट भए। दिल्लीका स्पिनरहरू कुलदीप यादव र अक्षर पटेलले कसिलो बलिङ गर्दै आरसीबीको रनको गति रोकेका थिए।
जवाफी ब्याटिङमा उत्रिएको दिल्लीको सुरुवात निकै खराब थियो। भुवनेश्वर कुमारले सुरुवाती तीन विकेट लिएर दिल्लीलाई दबाबमा पारेका थिए। तर, केएल राहुल (५७ रन) र ट्रिस्टन स्टब्स (नटआउट ६० रन) ले अर्धशतकीय पारी खेल्दै दिल्लीलाई खेलमा फर्काए।
अन्ततः डेभिड मिलरले विष्फोटक फिनिसिङ गर्दै आरसीबीलाई उसको घरेलु मैदानमै ६ विकेटको हार चखाए।
