चेन्नाई सुपर किंग्सका लागि आइपिएल २०२६ को सिजन कष्टकर बन्दै गएको छ। टोलीका लागि भरपर्दा ओपनिङ ब्याटर मानिएका १८ वर्षीय आयुष म्हात्रेको 'ह्यामस्ट्रिङ' च्यातिएपछि चेन्नाईलाई ठूलो झड्का लागेको छ।
शनिबार राति सनराइजर्स हैदरावादविरुद्धको लक्ष्य पछ्याउने क्रममा म्हात्रे 'इम्प्याक्ट प्लेयर'का रूपमा मैदान छिरेका थिए। सञ्जु सामसन आउट भएपछि दोस्रो ओभरमै आएका म्हात्रेले आक्रामक ब्याटिङ गर्दै १२ बलमा ३० रन बनाइसकेका थिए।
तर, दुई रन दौडिने क्रममा उनको बायाँ खुट्टाको मांशपेसी (ह्यामस्ट्रिङ) च्यातियो। उनी पीडाले छटपटाउँदै भुइँमा ढले र आफ्नो हेलमेट फाले। फिजियोले मैदानमै आएर लामो उपचार गरेपछि उनी फेरि ब्याटिङ गर्न त तम्सिए, तर खुट्टा घिसार्दै एउटा रन लिए लगत्तै अर्को बलमा आउट भए।
चेन्नाईका ब्याटिङ प्रशिक्षक माइक हसीले म्हात्रेको चोट गम्भीर हुन सक्ने बताएका छन्। उनले भने, ‘यो हाम्रा लागि निकै ठूलो घाटा हो। आयुष निकै राम्रो लयमा थिए। उनको स्क्यान गरेपछि मात्र कति समय मैदान बाहिर बस्नुपर्छ भन्ने थाहा हुनेछ। यद्यपि, यसले अर्को नयाँ खेलाडीका लागि भने अवसर सिर्जना गर्नेछ।’ म्हात्रेले यस सिजन १७७ को स्ट्राइक रेटमा २०१ रन बनाइसकेका छन्, जुन चेन्नाईका लागि सबैभन्दा धेरै हो।
भारतीय टोलीका अनुभवी खेलाडी तथा पूर्व चेन्नई स्टार आर अश्विनले भने चेन्नाईको व्यवस्थापनमाथि प्रश्न उठाएका छन्। आफ्नो युट्युब च्यानलमार्फत अश्विनले म्हात्रेको चोटलाई लिएर आक्रोश पोखे।
अश्विनले भने, ‘म्हात्रे पहिले देखि नै घुँडामा पट्टी (स्ट्रयाप) बाँधेर खेलिरहेका थिए। जब उनलाई मैदानमा गाह्रो भइरहेको थियो र उनी खोच्याइरहेका थिए, तब उनलाई किन जबरजस्ती दौडिन लगाइयो? उनलाई किन 'रिटायर्ड आउट' गराइएन? यति सानो उमेरको प्रतिभावान खेलाडीलाई यसरी लापरवाहीपूर्ण ढंगले खेलाउनु स्तब्धकारी छ।’
हैदरावादसँगको खेल १० रनले हारेपछि चेन्नाई अहिले अंक तालिकाको सातौं स्थानमा छ। ६ खेलमध्ये केवल २ खेल जितेको चेन्नाईका लागि म्हात्रेको चोटले ‘नुनमा खुर्सानी’ थपे जस्तै भएको छ। अब म्हात्रेको स्थानमा टोलीले उर्बिल पटेललाई मौका दिन सक्ने अनुमान गरिएको छ।
यदि म्हात्रेको चोट 'ग्रेड ३' को भएमा उनलाई निको हुन ६ महिनासम्म लाग्न सक्छ, जसको अर्थ उनको यो सिजन समाप्त भएको छ। अब हेर्नु यो छ कि धोनी र रुतुराजको यो टोलीले यो संकटबाट कसरी पार पाउनेछ।
