सोमबार साँझ पाँच बजे कीर्तिपुरस्थित त्रिवि अन्तर्राष्ट्रिय क्रिकेट मैदानमा पहिलो पटक फ्लड लाइटमा अन्तर्राष्ट्रिय क्रिकेट खेल हुँदैछ।
गत मंसिरमा मैदानमा फ्लड लाइट जडान भएपछि नेपाल प्रिमियर लिगको दोस्रो संस्करणका खेल राति भएका थिए। घरेलु क्रिकेटका खेलपछि त्रिविले पहिलो पटक साँझमा अन्तर्राष्ट्रिय खेल आयोजना गर्न लागेको हो।
जहाँ नेपाल र युएईबीचको दुई टी-२० खेल हुनेछन्। सोमबार पहिलो खेल हुँदा मंगलबार दोस्रो खेल हुनेछ। दुवै खेल साँझ पाँच बजे सुरु हुनेछन्।
नेपाल र युएईबीच २०२५ को अक्टोबरपछि पहिलो टी-२० खेल हुन लागेको हो। टी-२० विश्वकप छनोटअन्तर्गत ओमानमा भएको उक्त खेलमा नेपालले १ रनको जित निकालेको थियो।
सन् २०२३ देखि भएका पाँचमध्ये नेपालले तीन खेल जित्दा युएई २ खेलमा विजयी भएको छ।
युएईविरूद्धको टी-२० सिरिजमा नेपाली टोलीको नेतृत्व दीपेन्द्रसिंह ऐरीले गर्नेछन्। टोलीमा कुशल मल्लले पुनरागमन गरेका छन् भने सन्तोष यादवले पहिलो पटक स्थान बनाएका छन्।
नेपालले आइसिसी मेन्स क्रिकेट विश्वकप लिग-२ को सिरिजअघि त्रिवि मैदानमा युएईसँग टी-२० सिरिज खेल्न लागेको हो।
त्यसपछि नेपालले लिग-२ अन्तर्गत दुई महिनामा दुई वटा सिरिज नेपालले आयोजना गर्दैछ। नेपाल, ओमान र युएईबीचको त्रिकोणात्मक एकदिवसीय सिरिजसहित नेपाल, अमेरिका र स्कटल्यान्डबीच सिरिज हुन लागेको हो।
टी-२० नेपाली टोली
दीपेन्द्रसिंह ऐरी (कप्तान) सन्दीप लामिछाने, कुशल भुर्तेल, कुशल मल्ल, सन्दीप जोरा, आरिफ शेख, बसिर अहमद, गुलशन झा, लोकेश बम, नन्दन यादव, सन्तोष यादव, अर्जुन साउद, हेमन्त धामी, शहाब आलम र शेर मल्ल गरी १५ खेलाडी छन्। रिजर्भमा प्रतिश जीसी, नारायण जोशी र राशिद खान रहेका छन्।
-1776669356.jpg)
