श्रीलंकाका अलराउन्डर दासुन शनाकालाई पाकिस्तान सुपर लिग (पिएसएल) मा एक वर्षको लागि प्रतिबन्ध लगाइएको छ।
शनाकाले 'लाहोर कलन्दर्स'सँगको सम्झौता तोडेर आइपिएलटोली 'राजस्थान रोयल्स'मा आबद्ध भएको भन्दै पाकिस्तान क्रिकेट बोर्डले यो कारबाही गरेको हो।
बोर्डका अनुसार उनले सम्झौताका सर्तहरू उल्लंघन गर्दै एकतर्फी रूपमा नाम फिर्ता लिएका थिए। यो प्रतिबन्धका कारण उनले सन् २०२७ को पीएसएल खेल्न पाउने छैनन्।
लाहोर कलन्दर्सले उनलाई करिब २७ हजार अमेरिकी डलरमा किनेको थियो। यद्यपी उनी घाइते स्याम करनको स्थानमा करिब २ लाख १४ हजार अमेरिकी डलरको ठूलो रकममा राजस्थान रोयल्समा आबद्ध भए।
यसअघि जिम्बावेका तीव्र गतिका बलर ब्लेसिङ मुजराबानीलाई यस्तै कारणले २ वर्षको प्रतिबन्ध लगाइएको थियो। तर, शनाकाले सार्वजनिक रूपमा माफी मागेका कारण उनलाई १ वर्षको मात्र सजाय दिइएको बुझिएको छ। शनाकाले आफ्नो निर्णयप्रति पछुतो मान्दै पाकिस्तानी फ्यान र लाहोर कलन्दर्ससँग माफी मागेका छन्। उनले नाम फिर्ता लिँदा अर्को प्रतियोगिता खेल्ने कुनै सोच नभएको स्पष्ट पारेका छन्।
शनाका पीएसएलबाट प्रतिबन्धित हुने तेस्रो खेलाडी हुन्। यसअघि जिम्बावेका ब्लेसिङ मुजराबानी (कोल्काता नाइट राइडर्समा गएकोमा २ वर्ष प्रतिबन्ध) र दक्षिण अफ्रिकाका कोर्बिन बोश (आइपिएल रोजेकोमा चालू सिजनमा प्रतिबन्ध) लाई पनि कारबाही गरिएको थियो।
