आईपीएलमा ब्याटर र बलरबीच हराउँदै गएको सन्तुलनलाई पुन: कायम गर्न सचिन तेन्दुलकरले तीनवटा महत्वपूर्ण सुझावहरू अघि सारेका छन्।
उनको मुख्य माग भनेको विवादित 'इम्प्याक्ट प्लेयर' नियमलाई खारेज गर्नु हो।
अहमदाबादमा रोयल च्यालेन्जर्स बेंगलुरु र गुजरात टाइटन्स बीचको सन् २०२६ को फाइनल खेल हुनुभन्दा एक रात अघि आयोजित एक अवार्ड कार्यक्रममा बोल्दै तेन्दुलकरले भने, ‘व्यक्तिगत रूपमा मलाई लाग्छ कि 'इम्प्याक्ट प्लेयर' नियम अब हट्नुपर्छ।’
सन् २०२३ मा लागू गरिएको यो नियमले टिमहरूलाई खेलको बीचमा एक अतिरिक्त ब्याटर थप्ने सुविधा दिन्छ। यसले गर्दा ब्याटरहरूले निडर भएर खेल्न पाएका छन् र स्कोरहरू निकै उच्च बनिरहेका छन्। सचिनको तर्क छ, ‘ट्वान्टी–२० मा २० ओभर मात्र खेल्नुपर्ने ठाउँमा थप एक ब्याटर थप्नु बलरहरूका लागि अन्यायपूर्ण छ। यसले खेलको सन्तुलन बिगारेको छ।’
अहिलेको ६ ओभरको पावरप्लेलाई सचिनले दुई भागमा बाँड्न सुझाव दिएका छन्। पहिलो ४ ओभर 'ब्याटरको पावरप्ले' हुनेछ। बाँकी २ ओभर 'बलरको पावरप्ले' हुनेछ, जुन बलिङ गर्ने टिमको कप्तानले खेलको जुनसुकै बेला लिन पाउनेछन्। यो २ ओभरमा घेरा बाहिर एक अतिरिक्त फिल्डर (कुल ३ फिल्डर) राख्न पाइनेछ, जसले गर्दा बलिङ गर्ने टोलीले खेलमा राम्रो नियन्त्रण राख्न सकोस्।
अहिले एक बलरले अधिकतम ४ ओभर मात्र फाल्न पाउँछन्। तर सचिन भन्छन्, ‘टिमको सबैभन्दा उत्कृष्ट बलरलाई ५ ओभर बलिङ गर्न दिनुपर्छ। जब उत्कृष्ट ब्याटरले २० ओभरसम्म ब्याटिङ गर्न सक्छन् भने उत्कृष्ट बलरले किन ५ ओभर बलिङ गर्न नपाउने?’
यसअघि रिकी पोन्टिङले यस्ता नियमहरू साना प्रतियोगिताहरूमा परीक्षण गर्नुपर्ने बताएका थिए भने टम मूडी र इयान बिसपले पिचलाई बलर र ब्याटर दुवैका लागि उपयुक्त बनाउनुपर्नेमा जोड दिएका थिए। २१औं शताब्दीकै महान ब्याटर तेन्दुलकरको यो सुझावलाई क्रिकेट जगतले निकै महत्वका साथ हेरेको छ।
