बंगलादेशलाई पराजित गर्दै भारत साफ यु-१८ च्याम्पियनसिपको नयाँ च्याम्पियन बनेको छ।
आइतबार हल्चोकस्थित सशस्त्र प्रहरी बलको मैदानमा भएको फाइनलमा भिडन्तमा भारतले ९ खेलाडीमा सीमित बंगलादेशलाई २-१ गोलले पराजित गर्दै उपाधि उचालेको हो। यसअघिका दुई संस्करणको दुवै उपाधि नेपालले जितेको थियो।
भारतका लागि विक्रमप्रताप सिंहले खेलको दोस्रो मिनेटमा पहिलो गोल गरेका थिए। तर ४० मिनेटमा बंगलादेशका यासिनले बराबरी गोल फर्काए।
खेलको अन्तिम मिनेटमा भारतका लागि रविबहादुर रानाले गोल गरेपछि भारत च्याम्पियन बन्न सफल भयो।
त्यसअघि दुवै तर्फका खेलाडी आक्रामक हुँदा खेल तनावग्रस्त बनेको थियो। जसका कारण रेफ्रीले ३ वटा रातो कार्ड र ५ वटा पहेँलो कार्ड देखाउनु परेको थियो।
बंगलादेशका खेलाडीले २ रातो कार्ड र ४ पहेँलो कार्ड पाए। भारतका १-१ खेलाडीले रातो र पहेँलो कार्ड पाएका थिए।
खेलको तेस्रो मिनेटमै भारतका विक्रमले पहेँलो कार्ड पाए। १८ मिनेटमा बंगलादेशका काजी र २० मिनेटमा फहिम पहेँलो कार्ड पाए।
२३ मिनेटमा भारतका गुरीकिरात र बंगलादेशका फहिमले रातो कार्ड पाउँदा दुवै टिम १०-१० खेलाडीमा सीमित भए।
३१ मिनेटमा बंगलादेश तनविरले अर्को पहेँलो कार्ड पाए।
४० मिनेटमा बंगलादेशका यासिनले बराबरी गोल फर्काए लगत्तै रातो कार्ड पाएका थिए। जसका कारण बंगलादेश ९ खेलाडीमा सीमित बन्यो।
बंगलादेशका खेलाडीले पहेँलो कार्ड पाउने क्रम यतिमै रोकिएन। ६९ बंगलादेशका सडेकुजानमले पहेँलो कार्ड पाएका थिए।
