फ्रेञ्च फुटबल लिग च्याम्पियन पिएसजीका पूर्व प्रशिक्षक एन्टोनी कोम्बाउरले आगामी सिजनको फ्रेञ्च लिग वानमा २२ टिम नभए खेलाडीहरूले आन्दोलन गर्नु पर्ने बताएका छन्।
कोरोनाभाइरस कारण फ्रेञ्च लिग वान रद्द भएको थियो। रद्द गरिएसँगै अंक तालिकाको शीर्ष स्थानमा रहेको पिएसजीलाई च्याम्पियन घोषणा गरिएको थियो। अंक तालिकाको अन्तिम दुई स्थानमा रहेका अमिन्ज र टुलुज रेलिगेशनमा पर्दै तल्लो डिभिजनमा झरेका थिए।
लिगका सम्पूर्ण खेल नभएको अवस्थामा च्याम्पियन बनाउने र रेलिगेशन गर्ने निर्णयको अहिले फ्रान्समा विरोध भइरहेको छ। अमिन्ज र लियोनले कानुनी उपचारमा जाने चेतावती दिइसकेका छन्।
यो निर्णयमा एन्टोनी पनि असन्तुष्ट देखिएका छन्। उनले खेलाडीहरुलाई आन्दोलन गर्न आह्वान गरेका छन्। रेलिगेशनमा परेका दुवै क्लबलाई पहिलो डिभिजनमै नखेलाए २०२०-२१ को सिजन खेल्न खेलाडीहरूले अस्वीकार गर्नु पर्ने उनको भनाइ छ।
फ्रेञ्च मिडिया एल'इक्युपलाई अन्तर्वार्ता दिँदै एन्टोनीले रेलिगेशनको निर्णय अव्यवहारिक भएको तथा यसले खेलाडीको करिअर संकटमा पर्ने दाबी गरेका हुन्। त्यसैले खेलाडीहरु यो निर्णयविरुद्ध एकजुट हुनु पर्ने उनको भनाइ छ।
एक टिमले २८ खेल खेलेको अवस्थामा फ्रेञ्च लिग वान रद्द भएको थियो। अमिन्ज १८औं स्थानको निम्स भन्दा ४ अंक मात्र पछि थियो। अमिन्स र टुलुज रेलिगेशनमा पर्दा लोरियन्ट र लेन्सले आगामी दुई सिजनका लागि लिग वानमा स्थान पाएका थिए।
रेलिगेशन खारेज गरेको अवस्थामा शीर्ष टिममा उक्लिएका दुई क्लबसहित २२ टिमबीच आगामी सिजनको लिगमा प्रतिस्पर्धा हुनेछ।
