इंग्लिस प्रिमियर लिगको अंक तालिकामा चौथो स्थानमा रहेको लेस्टर सिटी पराजित भएको छ। लेस्टरलाई आइतबार राति भएको खेलमा बर्नमाउथले ४-१ गोलले पराजित गरेको हो।
पहिलो हाफमा १-० ले अघि रहेको लेस्टरले दोस्रो हाफमा चार गोल खायो। उसका लागि जिमी भर्डीले २३ मिनेटमा पहिलो गोल गरे।
६७ मिनेटमा सोयुन्कुले रातो कार्ड पाएपछि लेस्टर १० खेलाडीमा सीमित बन्यो। त्यसपछि प्राप्त पेनाल्टीमा बर्नमाउथका स्टानिस्लासले गोल गर्दै खेललाई बराबरीमा ल्याए। लगत्तै सोलाङ्केले गोल गरेर बर्नमाउथलाई अग्रता दिलाए। ८३ मिनेटमा लेस्टरका इभान्सले आफ्नै पोस्टमा गोल गरेका थिए भने ८७ मिनेटमा सोलाङ्केले बर्नमाउथका लागि चौथौ गोल गरे।
हारसँगै लेस्टरले चेल्सीलाई पछि पारेर तेस्रो स्थानमा उक्लने मौका गुमायो। ३५ खेलमा ५९ अंक जोडेको लेस्टर चौथौ स्थानमा छ। तेस्रो स्थानको चेल्सीको ६० अंक छ। एक खेल कम खेलेको म्यानचेस्टर युनाइटेड ५८ अंकसहित पाँचौ स्थानमा छ।
यता टोटनह्यामले आर्सनललाई २-१ गोलले पराजित गरेको छ। खेलको १६ मिनेटमा लाकजेटीले गोल गरेर आर्सनललाई अग्रता दिलाए।
१९ मिनेटमा टोटनह्यामका सन हेउङ् मिनले बराबरी गोल फर्काए। ८१ मिनेटमा टोवी एल्डरवेइरेल्डले गोल गरेर टोटनह्यामलाई अग्रता दिलाएका थिए।
जितसँगै आठौं स्थानको टोटनह्यामले ३५ खेलबाट ५२ अंक जोडेको छ। नवौं स्थानको आर्सनलको ५० अंक छ।