रायो भालेकानो र भ्यालेन्सियाले स्पेनिस ला लिगामा सफलता हात पारेका छन्। घरेलु मैदानमा आइतबार राति भएको प्रतिस्पर्धात्मक खेलमा रायो भालेकानोले स्पान्योललाई १–० गोलले हरायो। भ्यालेन्सियाले सेल्टा भिगोलाई उसैको मैदानमा २–१ गोलले स्तब्ध बनायो ।
रायो भालेकानोले आत्मघाती गोल सहयोगमा बाजी मारेको हो। ५४औं मिनेटमा डिबक्स भित्र बल बचाउने क्रममा स्पान्योलका लियन्ड्रो काबरेराको प्रहार आत्मघाती गोलमा परिणत भएको थियो ।
त्यसपछि दुवै टोलीबाट थप गोल नहुँदा रायो भालेकानो विजयी भयो। ५० प्रतिशत बल पोसेसन राखेका दुवै टोलीले गोल गर्ने राम्रा अवसर गुमाएका थिए । रायो भालेकानोका अल्भारो गार्सिया ‘म्यान अफ दी म्याच’ भए ।
जितसँगै १६ खेलबाट २७ अंक बनाएको रायो भालेकानो छैठौं स्थानमा उक्लिएको छ। पराजित स्पान्योल २० अंक सहित ११औं स्थानमा छ। शीर्षस्थानमा रहेको रियल म्याड्रिडको ३९ अंक छ । दोस्रो स्थानमा रहेको सेभियाको ३१ र तेस्रो स्थानमा रियल बेटिसको ३० अंक छ ।
यसैगरी भ्यालेन्सियाको जितमा हुगो डुरोले १९औं र म्याक्सिमिलियनो गोमेजले ५३औं मिनेटमा गोल गरे । सेल्टा भिगोका इगो आसपासले ११औं मिनेटमा सुरुवाती गोल गरेपनि टोलीको हार जोगिएन । जितसँगै २२ अंक बनाएको भ्यालेन्सिया आठौं स्थानमा छ । पराजित सेल्टा भिगो १६ अंक सहित १४औं स्थानमा छ ।
रेलिगेसन जोगाउन प्रयासरत इल्चे र काडिजबीचको खेलमा इल्चेले बाजी मारेको छ । घरेलु मैदानमा इल्चेले काडिजलाई ३–१ गोलले हरायो । जितसँगै १५ अंक बनाएको इल्चे रेलिगेसन छल्दै १६औं स्थानमा उक्लिएको छ । पराजित काडिज १२ सहित १८औं स्थानमा छ । अर्को खेलमा लिभान्ते र ओसासुनाले गोलरहित बरबरी खेल्दै अंक बाँडेका छन् ।
