एभर्टन र म्यानचेस्टर सिटीबीच सोमबार भएको खेलका क्रममा सिटीका खेलाडी एन्टोइन सेमेन्योमाथि जातीय विभेद (रङ्गभेद) गरेको आरोपमा मर्सिसाइड प्रहरीले एभर्टनका एक समर्थकलाई पक्राउ गरेको छ। ३-३ गोलको बराबरीमा सकिएको उक्त खेलका क्रममा यो घटना भएको हो।
प्रहरीका अनुसार नटिंगघमशायरका ७१ वर्षीय वृद्धलाई पक्राउ गरिएको छ। खेल हेर्न आएका अन्य समर्थक र सुरक्षाकर्मीहरूले ती व्यक्तिले रङ्गभेदी गाली गरेको उजुरी दिएपछि उनलाई नियन्त्रणमा लिइएको हो।
अहिले उनलाई केही कडा सर्तहरूसहित धरौटीमा छाडिएको छ। ती सर्तअनुसार उनले कुनै पनि खेल सुरु हुनुभन्दा ४ घण्टा अगाडिदेखि खेल सकिएको ४ घण्टा पछिसम्म कुनै पनि खेल मैदान (रंगशाला) को एक माइल वरपर जान पाउने छैनन्।
एभर्टन फुटबल क्लबले यस घटनाको भर्त्सना गर्दै भनेको छ, "यस्तो व्यवहार किमार्थ सह्य हुँदैन। रङ्गभेद र भेदभावको हाम्रो खेलकुद र समाजमा कुनै ठाउँ छैन।" क्लबले प्रहरीलाई अनुसन्धानमा पूर्ण सहयोग गर्ने र दोषीमाथि कडा कारबाही गर्ने प्रतिबद्धता जनाएको छ।
म्यानचेस्टर सिटीले पनि एभर्टन र प्रहरीले तुरुन्तै चालेको कदमको प्रशंसा गरेको छ।
यसै सिजनमा २६ वर्षीय घानाका खेलाडी एन्टोइन सेमेन्योमाथि रङ्गभेद भएको यो दोस्रो पटक हो। यसअघि लिभरपुलसँगको खेलमा पनि उनीमाथि यस्तै दुर्व्यवहार भएको थियो। सेमेन्योले फुटबलमा हुने रङ्गभेद रोक्न दोषीलाई जेल सजायसम्म हुनुपर्ने माग गर्दै आएका छन्।
यति मात्र होइन, म्यानचेस्टर सिटीका अर्का डिफेन्डर मार्क गुएहीमाथि पनि खेलपछि सामाजिक सञ्जालमा निकै नराम्रो रङ्गभेदी टिप्पणी गरिएको सिटीले बताएको छ। क्लबले आफ्ना दुवै खेलाडीलाई पूर्ण समर्थन दिने बताएको छ।
