स्पेनिस क्लब बार्सिलोना र इङ्ग्लिस क्लब न्यूक्यासल युनाइटेडबीच फरवार्ड एन्थोनी गोर्डनको ट्रान्फर लागि ऐतिहासिक सम्झौता भएको छ। यो सम्झौता ८० मिलियन यूरो भन्दा बढी मा टुङ्गिएको हो।
लामो समयको वार्तापछि दुवै क्लब मूल्यमा सहमत भएका छन्। बार्सिलोनाले प्रस्ताव गरेको रकम न्यूक्यासलले स्वीकार गरेपछि गोर्डनको क्याम्प नोउ जाने बाटो खुलेको हो।
जर्मन क्लब बायर्न म्युनिखले पनि गोर्डनलाई भित्र्याउन चाहेको थियो, तर उनीहरूले न्यूक्यासलले मागेको जति रकम दिन नसकेपछि बार्सिलोनाले बाजी मारेको हो।
गोर्डन आगामी विश्वकपको तयारीका लागि इङ्गल्याण्डको टोलीसँग अमेरिका उड्नुअघि नै बार्सिलोनासँगका सबै कानुनी प्रक्रियाहरू पूरा गर्ने तयारीमा छन्।
प्रिमियर लिगको यस सिजनमा १२औं स्थानमा सीमित भएको न्यूक्यासललाई आफ्नो टोली पुनर्गठन गर्न ठूलो रकमको खाँचो थियो। गोर्डनको सम्झौता सन् २०३० सम्म रहेकाले न्यूक्यासलले उनीमाथि मोटो रकम असुल्न सफल भयो।
गोर्डनको पूर्व क्लब एभर्टनले पनि यस डिलबाट फाइदा पाउनेछ। न्यूक्यासलले गोर्डनलाई बेच्दा हुने नाफाको १५% हिस्सा एभर्टनलाई दिनुपर्ने सर्त यसअघि नै तय थियो।
सिजनका अन्तिम चार खेलहरूमा प्रशिक्षक एडी हावेले गोर्डनलाई बेन्चमा राखेका थिए, जसले उनी क्लब छोड्दैछन् भन्ने सङ्केत गरिसकेको थियो। फुलहाम विरुद्धको अन्तिम खेलमा न्यूक्यासलका फ्यानहरूले गोर्डनको नाम गाएर उनलाई बिदाइ गरेका थिए।
