एम्स बैठक र अन्तर्राष्ट्रिय सम्मेलनसँगै २४ जेठमा नेपाल हेरिटेज रन हुनेरेस नेपालको आयोजनामा आगामी जेठ २४ गते शनिबार काठमाडौँ र ललितपुरका सम्पदा जोड्नेगरी नेपाल हेरिटेज रन (काठमाडौं २५ के रन) हुने भएको छ ।
विश्व रनिङको साझा संस्था एसोसियसन अफ इन्टरनेसनल म्याराथन एण्ड डिस्टेन्स रेस (एम्स)को बोर्ड बैठक नेपालमा आयोजना हुनलागेको सन्दर्भ पारेर हेरिटेज रन सुरु गर्न लागिएको हो । विश्व सम्पदा सूचीमा परेका सम्पदाहरु जोड्नेगरी २५ किमी दुरीको दौडको रुट तयार गरिएको छ । नेपालमा पहिलो पटक हुनलागेको हेरिटेज रनले खेलाडीलाई उत्साह थप्ने अपेक्षा आयोजक रेस नेपालले लिएको छ ।
त्रिपुरेश्वरस्थित दशरथ रंगशालाबाट सुरु भई सुन्धारा, न्युरोड, काठमाडौं दरबार स्क्वायर, रानीपोखरी, दरबारमार्ग, कमलपोखरी, गौशाला, पशुपतिनाथ, तीनकुने, ग्वार्को, पाटन दरबार स्क्वायर, पुलचोक, थापाथलीहुँदै दशरथ रंगशाला पुगेर २५ किमी दौड पुरा हुनेछ । यससँगै विद्यालयस्तरीय विद्यार्थी र भेट्रानतर्फ ५ किमी दौड समावेश गरिएको छ । तीन वटै विधाका दौडका लागि दर्ता खुला भइसकेको आयोजकले जनाएको छ । नगद पुरस्कार चाँडै घोषण गरिने छ ।
रेस नेपालले हेरिटेज रन सन्चालनका लागि सबैलाई सहकार्य गर्न आग्रह गरेको छ । यस दौड सन्चालनका लागि नेपाल एथ्लेटिक्स परिवारसँग सहआयोजकका रुपमा सहकार्य गरिएको छ । साथै राजन खत्रीलाई दौड व्यवस्थापनको संयोजकको जिम्मेवारी दिइएको छ ।
एम्सको बोर्ड बैठक, कंग्रेस वा कन्फ्रेन्सका क्रममा रोड रेस गर्नुपर्ने प्रोटोकलअनुसार नेपाल हेरिटेज रन आयोजना गर्न लागिएको हो । एम्सको बोर्ड बैठक यही जेठ २१ र २२ गते ललिपुरस्थित होटल हिमालयमा बस्दैछ । एम्सको बोर्ड बैठकलगत्तै जेठ २३ गते शुक्रवार नेपाल इन्टरनेसनल रनिङ कन्फ्रेन्स हुँदैछ । रनिङसम्बन्धि कन्फ्रेन्स दक्षिण एशियामै पहिलोपटक नेपालमा हुनलागेको एम्स दुत तथा कन्फ्रेन्स अध्यक्ष टीएस ठकुरीले बताए । ‘निजी तथा सरकारी दुवैको उत्साहजनक साथ पाए हरेक बर्ष नेपालमा कन्फ्रेन्स र हेरिटेज रन निरन्तरता दिइनेछ’ धारा नेपालगन्ज म्याराथनका संस्थापक टीएस ठकुरीले भने–‘अन्र्तराष्ट्रियस्तरका धावक वा आयोजकहरुलाई नेपाल ल्याउने यो प्रभावकारी माध्यम बन्न सक्छ, यसले नेपालको खेल पर्यटनमा योगदान गर्नसक्छ, यही सोंचबमोजिम कन्फ्रेन्स र हेरिटेज रन परिकल्पना गरिएको हो ।’
विश्व म्याराथनको साझा संस्था एसोसियसन अफ इन्टरनेसनल म्याराथन एण्ड डिस्टेन्स रेस(एम्स)सँगको सहकार्यमा दौडसम्बन्धि अन्तर्राष्ट्रिय कन्फ्रेन्स दक्षिण एशियामै पहिलोपटक नेपालमा हुन लागेको हो ।
कन्फ्रेन्समा शिक्षा, खेलकुद र पर्यटनसँग सम्बन्धित चारवटा सेसन रहने छन् । पहिलो सेसनमा एम्सका प्रेसिडेन्ट पाको बोराओसँग बिशेष साक्षात्कार हुनेछ । पाको विश्व प्रतिष्ठित भ्यालेन्सिया म्याराथनका रेस डाइरेक्टर हुन् ।
त्यसैगरी, विश्व प्रतिष्ठित म्याराथनका प्रमुख व्यक्तित्वले ‘सामाजिक आन्दोलन र सामाजिक परिघटनाका रुपमा म्याराथन’ बिषयमा विद्धत प्रवचन दिनेछन् भने ‘खेलकुद र पर्यटन : आर्थिक र सांस्कृतिक सम्भावनाको ढोका खोल्दै’ र ‘दिगो भविष्यका लागि दौड ः स्वास्थ्य, शिक्षा, जलवायु कार्य र विश्वव्यापी एकतालाई प्रवद्र्धन गर्दै’ गरी दुई बिषय रहने छन् । हरेक सत्रमा दुई विदेशी र दुई नेपाली गरी चार वक्ता र एक सहजकर्ता रहनेछन् ।
एम्सको बोर्ड बैठकलगायत अन्य कार्यक्रम व्यवस्थित र फलदायी बनाउन नेपालका प्रतिष्ठित म्याराथन आयोजकहरु रहेको मुलआयोजक समिति गठन गरिनेछ । कन्फ्रेन्समा युरोप, अमेरिका, जापान, थाइल्याण्ड, मलेसिया, भियतनाम, इन्डोनेसिया, सिंगापुर लगायत दक्षिण एशियाली राष्ट्रहरु गरी दुई दर्जन बढी देशका प्रतिनिधिको सहभागिता रहने छ ।
-1756794700.JPG)
-1746009348.jpg)
