सिहान शान्त थोकरले पान अमेरिकन कराते महासंघबाट रेफ्रीमा दोहोरो ए लाइसेन्स प्राप्त गरेका छन्। जुन नेपाली मूलका कराते रेफ्रीको पहिलो उपलब्धि हो।
मेक्सिकोको मोन्टेरेमा मे १९–२५, २०२५ मा भएको ३८औं सिनियर पान अमेरिकन कराते च्याम्पियनसिपमा उनले काता र कुमुतेमा ए लाइसेन्स हासिल गरे। थोकरले यसअघि सन् २०२३ मा कुमुतेमा ए लाइसेन्स पाइसकेका थिए।
पान अमेरिकन कराते महासंघ, विश्व कराते महासंघअन्तर्गत ३७ राष्ट्रको छाता संगठन हो।
यसले सिनियर र जुनियर च्याम्पियनसिप आयोजना गर्छ। ए लाइसेन्सका लागि राष्ट्रिय स्तरमा काता र कुमुतेमा उच्च तह पूरा गर्नुपर्छ। थोकरले यो सफलतासँगै नोभेम्बर २०२५ मा इजिप्टको काइरोमा हुने विश्व च्याम्पियनसिपमा रेफ्रीको भूमिका पाउने बाटो खुलेको छ।
थोकरले २००७ मा न्युयोर्कमा पहिलो नेपाली कराते स्कूल स्थापना गरेका थिए। सन् २०२४ मा उनले न्युयोर्क कराते च्याम्पियनसिप आयोजना गरेका थिए। अब हरेक डिसेम्बरमा ‘आइएमए न्युयोर्क कराते च्याम्पियनसिप’ गर्ने घोषणा गरेका छन्।
दोलखाका थोकरले अमेरिकामा छैटौं डान प्राप्त गरेका छन्। जुन करातेमा सम्मानित गुरुको दर्जा हो। २०४२ मा काठमाडौं आएर वादोरियो कराते सिकेका उनले २०४९ मा राष्ट्रिय प्रतियोगितामा स्वर्ण जिते। पछि सोतोकानमा लागे र अन्तर्राष्ट्रिय प्रतियोगितामा पनि पदक हासिल गरे।
यो पनि :- अमेरिकामा कराते स्कुल खोल्ने पहिलो नेपाली (भिडिओ)
