पोखरा– १२ लालीगुराँस टोलका जागरूक युवाहरूले 'लालीगुराँस एसोसिएसन क्लब' गठन गर्दा फुटबलमा लाग्ने सोच बनाएका थिएनन्।
उनीहरू पोखरा सभागृहमा नेपथ्य ब्याण्डको कन्सर्ट आयोजना गर्न चाहन्थे। आयोजक संस्था नभए प्रशासनले कन्सर्टको अनुमति नदिने, शान्ति सुरक्षा नदिने जस्ता कुरा गर्न थाले।
त्यसपछि हतार हतार उनीहरूले २०६९ वैशाखमा आफ्नै टोलको नाममा लालीगुराँस एसोसिएसन क्लब गठन गरेर दर्ता गरे। क्लब दर्ता गरेको करिब २ सातापछि नेपथ्य ब्याण्डको कन्सर्ट आयोजना गरे।
कन्सर्ट आयोजना गर्न उनीहरूले नेपथ्य ब्याण्डका भोकलिष्ट अमृत गुरूङसँग कुराकानी गरेका थिए। नेपथ्यको व्यवस्थापक नेपालयसँग सल्लाह गरेर उनीहरूले कसर्ट आयोजना गरिछाडे। त्यही कन्सर्ट गर्न खोलिएको क्लब अहिले फुटबलमा अपराजित यात्रामा निस्किएको छ।
'नेपथ्य ब्याण्डको कन्सर्ट गर्न संस्था चाहिन्छ भनेपछि हामीले हतारहतार लालीगुराँस एसोसिएसन क्लब दर्ता गर्यौं,' क्लबका अध्यक्ष डम्मरजंग गुरूङले भने, 'क्लब स्थापना गर्दा फुटबलमा लाग्ने सोच बनाएका थिएनौं।'
लालीगुराँस टोलका युवाहरू फुटबलमा चासो राख्थे। उनीहरू अन्य क्लबमा आबद्ध भएर फुटबल खेल्थे। पोखरामा आयोजना भइरहने स्थानीय स्तरका प्रतियोगिताहरूमा भाग लिँदा उनीहरू उपाधी जित्थे। त्यसपछि क्लबले फुटबलमा लाग्ने योजना बनाएको अध्यक्ष गुरूङले बताए।
क्लबले आफ्नै फुटबल टिम बनाएर खेल्न थालेपछि उनीहरूले हारेका छैनन्।
जिल्लास्तरका लिग, प्रदेश र राष्ट्रिय स्तरका प्रतियोगिता पनि उनीहरूले जितेका छन्। जिल्ला र प्रदेशबाट छानिएर गत कात्तिक १९ देखि मंसिर २ गतेसम्म हेटौंडाको गौरीटार रंगशालामा भएको 'एन्फा प्रेसिडेन्ट कप' फुटबल प्रतियोगितामा उनीहरूले उपाधी जिते। राष्ट्रिय प्रतियोगिता जितेपछि उनीहरूको मनोबल पनि बढेको छ।
प्रेसिडेन्ट कप च्याम्पियन बनेसँगै लालीगुराँस एसोसिएसनलाई अब यही पुस २५ गतेदेखि सुरू हुने एन्फा राष्ट्रिय लिग फुटबल प्रतियोगिता खेल्न पाउने अवसर जुरेको छ। यो प्रतियोगितामा नेपालका १३ वटै ए डिभिजन क्लब खेल्दैछन् भने प्रेसिडेन्ट कप खेलेका ४ वटा उत्कृष्ट टिमहरू पोखराको लालीगुराँस एसोसिएसनसँगै नव जनजागृति फुटबल क्लब, चित्लाङ फुटबल क्लब र काँक्रेविहार फुटबल क्लबले पनि प्रतिस्पर्धा गर्दैछ।
अखिल नेपाल फुटबल संघको कात्तिक २ गते बसेको बैठकले राष्ट्रिय लिग फुटबल प्रतियोगितामा ए डिभिजन क्लबका उत्कृष्ट ६ वटा टिम र प्रेसिडेन्ट लिग खेलेका उत्कृष्ट ४ वटा टिमलाई मात्र सहभागिता गराउने निर्णय गरेको थियो। त्यतिबेला भएको निर्णय अनुसार उत्कृष्ट ए डिभिजन क्लबहरू चर्च ब्वाइज युनाइटेड क्लब, मछिन्द्र फुटबल क्लब, नेपाल पुलिस क्लब, जावलाखेल युथ क्लब, सातदोबाटो युथ क्लब र एनआरटी मात्र सहभागी हुने भनिएको थियो।
एन्फाका एक पूर्व पदाधिकारीका अनुसार एन्फाले शहिद स्मारक ए डिभिजन लिग प्रतियोगिता आयोजना गर्न नसकेपछि राष्ट्रिय लिगमा सबै ए डिभिजन क्लबलाई खेलाउने निर्णय गरेको हो। यस निर्णयले मोसलबाट खेल्न जाने फुटबल क्लबलाई आर्थिक भार बढेको लालीगुराँस एसोसिएसनका अध्यक्ष गुरूङ बताउँछन्।
'राष्ट्रिय लिगमा ए डिभिजनका उत्कृष्ट ६ वटा र प्रसिडेन्ट कपका उत्कृष्ट ४ वटा टिम मात्र खेल्ने भनिएको थियो। १३ वटै ए डिभिजन क्लबलाई खेल्न मौका दिने भनेपछि खेल लम्बिन्छ। हाम्रो जस्तो उदयमान क्लबको व्यवस्थापन खर्च बढ्छ,' उनले भने।
फुटबल टिम बनाएर राष्ट्रिय प्रतियोगिताहरूमा भाग लिन क्लबलाई आर्थिक संकट परेको अध्यक्ष गुरूङ बताउँछन्। उनका अनुसार, हेटौंडामा भएको प्रेसिडेन्ट कप फुटबल खेल्दा १६० दिनमा ५० लाख रूपैया खर्च भएको थियो। जबकी, उनीहरू च्याम्पियन बन्दा १० लाख रूपैयाँ मात्र पुरस्कार पाए।
'फुटबल प्रतियोगिता जित्दा पनि खर्च उठ्दैन,' अध्यक्ष गुरूङले सेतोपाटीलाई भने, 'पोखरामा फुटबलका असाध्यै क्रेज भए पनि टिम बनाउन नसक्नुको पछाडी आर्थिक समस्या हो।'
अब हुन लागेको राष्ट्रिय लिग खेल्न उनीहरू आर्थिक संकलनमा जुटेका छन्। पोखराका व्यवसायिक घरानादेखि सरकारी अड्डाहरूमा उनीहरूले प्रस्ताव पुर्याएका छन्। तर कहीँबाट पनि प्रोत्साहन पाउन नसकेको क्लबका महासचिव इश्वर बस्यालले बताए।
'नेपालकै अरू ठाउँमा सरकारी निकायले नै फुटबलमा अत्याधिक पैसा लगानी गरेका छन्। व्यवसायीले पनि दरिलो साथ दिएको पाउँछौं,' बस्यालले भने, 'हामीले प्रेसिडेन्ट लिग च्याम्पियन बन्दा पनि अहिलेसम्म कसैको साथ पाएका छैनौं।'
लालीगुराँस एसोसिएसनले हङकङ, बेलायत, जापान, अष्ट्रेलिया, मकाउ, अमेरिका लगायतका देशमा पनि लालीगुराँस एसोसिएसन गठन गरेको छ। त्यहाँ रहेका नेपाली साथीहरूको सहयोगबाट नै अहिलेसम्मको फुटबल यात्रा गर्न सकेको महासचिव बस्याल बताउँछन्।
देशका अन्य ठाउँमा रहेका फुटबल क्लबहरूलाई स्थानीय सरकारले मनग्य सहयोग गरेको भन्दै पोखरामा पनि त्यस्तै सहयोगको अपेक्षा राखेको उनले बताए।
'विदेशमा भएका साथीहरूसँग अस्ति भर्खर प्रेसिडेन्ट कप खेल्न पैसा माग्यौं, अब फेरी राष्ट्रिय लिग खेल्नुपर्यो भनेर कसरी माग्ने,' उनले भने, 'टोखा नगरपालिकाले १ करोड, बाराको सिमारा नगरपालिकाले ५२ लाख रूपैयाँ त्यहाँको फुटबल क्लबलाई दिएको रहेछ। हामीलाई पनि पोखरा महानगरले सहयोग गरिदिएहुन्थ्यो।'
राष्ट्रिय लिग खेल्न जान गण्डकी प्रदेश सरकारसँग आर्थिक सहयोग माग्न जाँदा १ लाख रूपैयाँभन्दा बढी सहयोग गर्न नमिल्ने जवाफ पाएको क्लबका पदाधिकारीहरू बताउँछन्।
त्यहाँभन्दा बढी सहयोग गर्न मन्त्रिपरिषदले निर्णय गर्नुपर्ने भन्दै यसका लागि आफूले पहल गरेको जिल्ला खेलकुद विकास समिति कास्कीका अध्यक्ष मिलन गुरूङले बताए।
'प्रेसिडेन्ट कप च्याम्पिन बन्दा यहाँको सरकारी निकायले सहयोग गरेन, अब राष्ट्रिय लिग खेल्दा जसरी पनि सहयोग गर्नुपर्छ भनेर लागेको छु,' उनले भने, 'पोखरा महानगरपालिका र प्रदेश सरकारले अब पोखरामै एउटा ए डिभिजन क्लब बन्न सक्ने गरी सहयोग गर्नुपर्छ।'
राष्ट्रिय लिग खेलेपछि लालीगुराँस एसोसिएसनले आगामी वर्ष सी डिभिजन लिग खेल्ने क्लबको तयारी छ। त्यसपछि बि डिभिजन हुँदै ए डिभिजन फुटलब क्लब बनाउने लक्ष्य राखेको अध्यक्ष गुरूङले बताए।
'पोखराबाट अहिलेसम्म एउटा पनि ए डिभिजन फुटबल क्लब छैन, हामीले त्यहाँ पुग्ने लक्ष्य राखेका छौं,' उनले भने, 'फुटबलमा अघि बढ्न हाम्रो मात्र प्रयासले पुग्दैन, समर्थक, स्थानीय सरकार र व्यवसायीको पनि साथ चाहिन्छ।'
एलजी एसोसिएसनका मुख्य फुटबल प्रशिक्षक किरण श्रेष्ठले क्लबका खेलाडीहरू प्रतिभाशाली भएको भन्दै विगतमा जस्तै नतिजा आउन सक्ने आशा राखे। क्लबका खेलाडीहरू राम थापा, लक्ष्मण थापा र सिद्धार्थ रञ्जित १९ वर्ष मुनिका खेलाडीका रूपमा राष्ट्रिय टिमबाट खेलिसकेको उनले बताए।
नेपाली राष्ट्रिय फुटबल टिमका पूर्व सहायक प्रशिक्षकसमेत रहेका श्रेष्ठले आर्थिक समस्या पर्दा टिम निर्माणमा ढिलाई भएको बताए। विदेशी खेलाडी र राष्ट्रिय टिमका खेलाडीलाई क्लबमा आवद्ध गर्ने कुरा आर्थिक समस्याकै कारण निर्णय हुन नसकेको उनको भनाइ छ।
'पोखराका फुटबल खेलाडीहरू प्रतिभाशाली छन्। राष्ट्रिय लिग खेल्न केही विदेशी र केही राष्ट्रिय खेलाडी आवद्ध गराउन सक्दा हाम्रा खेलाडीलाई पनि प्रेरणा मिल्न सक्थ्यो,' उनले भने।
फुटबलका अलवा क्लबले अन्य सामाजिक कार्यमा पनि सक्रियता देखाइरहेको छ।गएको फागुनमा पोखरामा एलजी फेष्ट कन्सर्ट आयोजना गरेको क्लबले भुकम्प, बाढी पहिरो लगायतका विपत्तिमा परेका व्यक्तिलाई सहयोग गर्दै आएको छ।
२०७२ सालमा सेती नदीमा बाढी आउँदा पीडित बनेका परिवारका बालबालिकालाई छात्रवृत्ति प्रदान गरेको क्लबले कास्कीमा मात्र नभई धादिङसम्म पुगेर राहत र पुननिर्माणमा जुटेको थियो। अन्य सामाजिक कार्यसँगसँगै फुटबलमा बढी ध्यान दिएको क्लबका अध्यक्ष गुरूङ बताउँछन्।
'लालीगुराँस एसोसिएसनले अहिले मुख्यगरी फुटबलमा ध्यान दिएको छ।क्लबको ग्राउण्ड र एकेडेमी चलाउने योजना छ,' उनले भने, 'विपत्तिमा हातेमालो गर्ने कुरा त छँदैछ।'
-1746009348.jpg)
