अस्ट्रेलियाको विश्व वरियता जी–३ डब्ल्यूटी प्रेसिडेन्ट कप गोल्ड कोस्टमा नेपालका तेक्वान्दो खेलाडीहरूले उत्कृष्ट प्रदर्शन गर्दै तीन पदक जितेका छन्।
पुरुष टोलीले अन्डर–३० वर्ष उमेर समूहमा कास्य पदक जित्दा व्यक्तिगत पुम्से अन्डर–४० मा जितबहादुर बोटेले रजत र कमल श्रेष्ठले कांस्य पदक हात पारेका छन्।
मनोज श्रेष्ठ, शिशिर श्रेष्ठ र पारस भण्डारीको टिमले पुरुष अन्डर–३० टिम पुम्सेमा कास्य पदक जितेको हो।
यसैगरी व्यक्तिगत पुम्से अन्डर–४० वर्षमा जितबहादुर बोटेले रजत पदक जित्दा कमल श्रेष्ठले कास्य पदक हासिल गरे।
कमल श्रेष्ठ १३औँ दक्षिण एसियाली खेलकुद (साग) का स्वर्ण पदक विजेता खेलाडी समेत हुन्।
प्रतियोगितामा नेपालबाट रेफ्रीको भूमिकामा आशोक खड्का र बब्लु शिवाकोटीले निर्णायकको जिम्मेवारी सम्हालेका थिए।
