नेपालका शेखर थापाले ११ औं एसियाली आइटिएफ तेक्वान्दो च्याम्पियनसिपमा कास्य जितेका छन्।
मंगोलियाको उलानबटारमा भएको प्रतियोगितामा शेखरले ब्ल्याक वेल्ट तेश्रो डान प्याटर्नमा कांस्य जितेको नेपाल अन्तर्राष्ट्रिय तेक्वान्दो महासंघ (आइटिएफ) का महासचिव घमबहादुर थापाले जनाएका छन् ।
शेखरसंगै मंगोलियाका दोर्जपालाम अयुर्जानान पनि तेश्रो भए। मलेसियाका चिन लुङ काङले स्वर्ण तथा फिलिपिन्सका अमाइज क्रिस्टर लुले दोश्रो भए।
शेखरले स्पाइरिङतर्फ पुरुष ६५–७० केजी तौलसमूहमा पनि प्रतिस्पर्धा गरेका थिए। यो स्पर्धामा शेखरले पदक जितेनन्।
शेखर दक्षिण एसियाली आइटिएफ तेक्वान्दो च्याम्पियनसिपका पदक विजेता हुन्। उनले पहिलो संस्करणको प्याटर्न र दोश्रो संस्करणको स्पाइरिङमा रजत जितेका थिए । उनले तेश्रो इन्डो–नेपाल आइटिएफ तेक्वान्दोको स्पाइरिङमा स्वर्ण हात पारेका थिए। तेश्रो जनरल चोइ स्मृति राष्ट्रिय आईटीएफ तेक्वान्दो प्रतियोगिताको प्याटर्नमा शेखरले पहिलो स्थान हात पारेका थिए।
महासचिव थापासहित उक्त प्रतियोगितामा नेपाल अन्तर्राष्ट्रिय तेक्वान्दो महासंघ (आइटिएफ) का अध्यक्ष प्रवीणकुमार कार्कीले अम्पायरको भूमिका निर्वाह गरेका थिए। दोश्रोपटक एसियाली आइटिएफ तेक्वान्दो प्रतियोगितामा अम्पायरको भूमिका निर्वाह गरेका अध्यक्ष कार्कीले आईएमजीसी विश्व च्याम्पियनसिप र दक्षिण एसियाली आइटिएफ तेक्वान्दामा पनि अम्पायरको भूमिका निर्वाह गरेका थिए।
त्यस्तै महासचिव थापा पनि दोश्रोपटक एसियाली आइटिएफ तेक्वान्दो प्रतियोगतामा अम्पायरका रुपमा सहभागी भएका हुन्। थापाले सन् २०१९ र २०२५ मा आइटिएफ विश्व च्याम्पियनसिप तथा आईटीएफ वल्र्ड कपमा पनि अम्पायरको भूमिका निर्वाह गरेका थिए। थापा दक्षिण एसियाली आइटिएफ तेक्वान्दामा पनि अम्पायरको जिम्मेवारीमा थिए।
