जापानमा आयोजना हुने विश्वकै सबैभन्दा ठूलो महिला मात्र सहभागी हुने म्याराथन ‘नागोया वुमेन्स म्याराथन २०२७’ मा नेपाली महिला धाविकाले पनि सहभागिता जनाउन पाउने भएका छन्। प्रतियोगिताको अन्तर्राष्ट्रिय सहभागिताका लागि आवेदन मंगलबारदेखि खुला भएको छ।
गिनिज वर्ल्ड रेकर्डबाट विश्वकै ठूलो ‘अल–वुमन म्याराथन’का रूपमा प्रमाणित नागोया वुमेन्स म्याराथन आगामी मार्च १४, २०२७ (आइतबार) जापानको आइची प्रान्तस्थित नागोयामा आयोजना हुँदैछ। विश्व एथलेटिक्सको ‘प्लाटिनम लेबल रोड रेस’समेत रहेको प्रतियोगितामा विश्वस्तरीय धाविकासँगै पहिलोपटक म्याराथन दौडनेदेखि व्यक्तिगत उत्कृष्ट समयको लक्ष्य राख्ने धाविकासम्मले सहभागिता जनाउनेछन्।
आयोजकले सन् २०२७ का लागि प्रतियोगिताको क्षमता २ हजारले बढाएर २२ हजार धाविका पुर्याएको छ। ४२.१९५ किलोमिटरको एउटै दूरीमा १९ वर्षदेखि ८० वर्ष उमेर समूहसम्मका महिलाले आफ्नै लक्ष्यसहित दौडनेछन्।
नागोया वुमेन्स म्याराथनको विशेष आकर्षणमध्ये हरेक ‘फिनिसर’ले पाउने विशेष पुरस्कार पनि हो। दौड पूरा गर्ने प्रत्येक धाविकालाई फ्रान्सेली लक्जरी ब्रान्ड बाकारातले प्रतियोगिताका लागि तयार पारेको विशेष क्रिस्टल टम्बलर प्रदान गरिन्छ। सन् २०२७ को टम्बलरको डिजाइन भने दौडको अघिल्लो दिन आयोजना हुने म्याराथन एक्स्पोमा सार्वजनिक गरिनेछ।
प्रतियोगिताले महिला धाविकालाई सुरक्षित र सहज वातावरण उपलब्ध गराउने उद्देश्यले पर्याप्त चिकित्सकीय सहायता, ठूलो संख्यामा सफा शौचालय र फराकिलो चेन्जिङ सुविधाको व्यवस्था गर्दै आएको छ। सात घण्टाको समयसीमा, तुलनात्मक रूपमा समथर दौडमार्ग तथा एउटै स्थानबाट सुरु र समाप्त हुने व्यवस्थाले नयाँ धाविकालाई समेत सहज बनाउने आयोजकको भनाइ छ।
दौडको सुरुआत र समापन भेन्टेलिन डोम नागोयामा हुनेछ। यो ढाकिएको बेसबल रंगशाला भएकाले मौसम प्रतिकूल भए पनि धाविकालाई केही हदसम्म सुरक्षित वातावरण उपलब्ध हुन्छ। सन् २०२६ को संस्करणमा ९६.६ प्रतिशत सहभागीले दौड पूरा गरेका थिए।
म्याराथन सप्ताहन्तमा धाविकासँगै परिवार तथा समर्थकका लागि पनि विभिन्न कार्यक्रम आयोजना हुनेछन्। शुक्रबारदेखि सुरु हुने म्याराथन एक्स्पोमा ‘गो रनवे’ फेसन शो तथा लोकप्रिय गायक–गायिकाको विशेष प्रस्तुति लगायतका कार्यक्रम हुनेछन्।
महिलाका लागि मुख्य म्याराथन आयोजना भइरहँदा पुरुष धावकलाई पनि सोही दिन हुने नागोया सिटी म्याराथनमा सहभागी हुने अवसर छ। पुरुषसहित अन्य इच्छुक धावकले हाफ म्याराथन वा ८.५ किलोमिटरको नागोया रनमा भाग लिन सक्नेछन्।
अन्तर्राष्ट्रिय प्रवेशका लागि शुल्क र समय
नागोया वुमेन्स म्याराथन २०२७ को अन्तर्राष्ट्रिय प्रवेशका लागि प्रारम्भिक आवेदन अगस्ट ११ देखि २४, २०२६ सम्म खुला रहनेछ। प्रारम्भिक प्रवेश शुल्क २४ हजार जापानी येन तोकिएको छ।
नियमित आवेदन अगस्ट २५ देखि सेप्टेम्बर २३ सम्म खुला रहनेछ, जसको शुल्क २५ हजार येन हुनेछ। दुवै शुल्कमा अतिरिक्त प्रशोधन शुल्क लाग्नेछ।
अन्तर्राष्ट्रिय धाविकाका लागि ३ हजार ५०० स्थान छुट्याइएको छ। आवेदन ‘पहिलो आउनेलाई पहिलो प्राथमिकता’का आधारमा स्वीकार गरिनेछ।
त्यसैगरी नागोया सिटी म्याराथनका लागि अन्तर्राष्ट्रिय आवेदन पनि अगस्ट ११ देखि सेप्टेम्बर २३ सम्म खुला रहनेछ। हाफ म्याराथनको शुल्क १७ हजार येन र ८.५ किलोमिटरको नागोया रनको शुल्क १३ हजार येन तोकिएको छ। हाफ म्याराथनमा ३०० र नागोया रनमा १०० अन्तर्राष्ट्रिय धावकका लागि स्थान उपलब्ध गराइएको छ।
आयोजकका अनुसार नागोया वुमेन्स म्याराथन महिला धाविकाका लागि पहिलोपटक म्याराथन दौडनेदेखि विश्वस्तरीय प्रतिस्पर्धासम्मको साझा मञ्चका रूपमा विकास हुँदै आएको छ। नेपाली महिला धाविकाका लागि पनि अन्तर्राष्ट्रिय स्तरको प्रतियोगितामा सहभागी हुँदै नयाँ अनुभव र व्यक्तिगत लक्ष्य हासिल गर्ने अवसरका रूपमा यसलाई लिन सकिनेछ।
