केही समय अघिसम्म युट्युब ट्रेन्डिङमा म्युजिक भिडिओ, फिल्म, फिल्मका गीत, सिरियलसँगै अन्य लामा भिडिओ प्रशस्तै देखिन्थे। पछिल्लो समय भने युट्युब ट्रेन्डिङमा 'सर्ट्स भिडिओ' (छोटा भिडिओ) को वर्चश्व देखिन थालेको छ।
यति बेला युट्युबको नेपाल ट्रेन्डिङ हेर्ने हो भने अधिकांश 'सर्ट्स भिडिओ' नै छन्। ट्रेन्डिङको मुख्य विधामा नेपाली फिल्म, म्युजिक भिडिओ र सिरियल एउटा पनि देखिँदैन। अन्य कुनै नेपाली भिडिओ सामग्री पनि छैनन्।
उसो त अहिले युट्युब ट्रेन्डिङमा मुख्यसहित म्युजिक, गेमिङ, मुभिज गरी छुट्टाछुट्टै विधा छ। अन्य विधामा केही नेपाली फिल्म र म्युजिक भिडिओ ट्रेन्डिङमा देखिए पनि मुख्य विधामा छैनन्।
यसले पछिल्लो समय छोटा भिडिओतर्फ दर्शकको आकर्षण बढेको सजिलै बुझ्न सकिने कलाकारहरूको सामाजिक सञ्जाल (सोसल मिडिया) सल्लाहकारका रूपमा काम गर्दै आएका राजेन्द्र अर्याल बताउँछन्।
कलाकारहरूलाई खासगरी युट्युब च्यानल व्यवस्थापन गर्न सघाउँदै आएका राजेन्द्रका अनुसार युट्युब ट्रेन्डिङमा रहेका छोटो भिडिओ खासगरी रमाइलो कन्टेन्टका धेरै छन्। बालबालिकाको कन्टेन्टमा पनि यस्ता भिडिओ प्रशस्त देखिन्छन्।
उनी भन्छन्, 'स्क्रोल गर्न सजिलो हुने, छोटो समयमा धेरै हेर्न सकिने, रमाइलो हुने र बच्चाबच्चीको कन्टेन्ट पनि धेरै आइरहेकाले त्यस्ता कन्टेन्ट बच्चाबच्चीले पनि रमाइलो मानेर हेर्ने हुँदा भ्युअर्स राम्रो देखिन्छ। भ्युज राम्रो भएपछि ट्रेन्डिङमा पनि सर्टस् भिडिओ नै अगाडि आएको हो भन्ने लाग्छ।'
अहिले युट्युबले ट्रेन्डिङको विधा छुट्ट्याइदिएकाले पनि मुख्य विधामा एकाधबाहेक लामो भिडिओ कमै आएको हुनसक्ने उनको बुझाइ छ। फिल्म (मुभिज) विधा र गीत (म्युजिक) विधातर्फ ट्रेन्डिङमा आउने र एकाध लामो भिडिओ मात्रै मुख्य विधामा परिरहेको हुँदा ट्रेन्डिङमा सर्ट्स वर्चश्व बढ्दै गएको पनि हुनसक्ने उनले बताए।
अहिले धेरै ध्यान तान्ने खालका नेपाली कन्टेन्ट नआएको भएर पनि ट्रेन्डिङमा नपरेको हुनसक्ने समेत उनको भनाइ छ।
युट्युबको सर्ट्सले अहिले टिकटकलाई चुनौती दिएको छ। यसमा कन्टेन्ट राख्नेहरूले राम्रो आम्दानी समेत गर्दै आएका छन्।
कलाकारहरूले पनि यसबाट राम्रो कमाइ गर्नसक्ने राजेन्द्र बताउँछन्। तर नेपालमा कलाकारहरूले सर्ट्स भिडिओ कमै राख्ने गरेका छन्। बरू रिल्स (फेसबुक/इन्स्टाग्राममा छोटो भिडिओ) धेरै राख्छन्।
कन्टेन्ट राख्न सके युट्युब सर्ट्स पनि कमाइको राम्रो प्लेटफर्म हुने राजेन्द्रको भनाइ छ।
