पाँच दर्जनभन्दा बढी म्युजिक भिडिओमा मोडलिङ गरेका रमेश विश्वकर्माले यसैवर्ष ठूलो पर्दामा डेब्यु गरे।
उनको पहिलो फिल्म 'मन बिनाको धन' ले सिनेमा हलहरूमा राम्रो व्यापार गरिरहेको छ।
अशोक दर्जीको मुख्य अभिनय रहेको फिल्मलाई सुरूमा कमजोर सोचिएको थियो। तर यसले दर्शकको मन जित्दै अहिलेसम्म करिब चार करोडको व्यापार गरेको जनाइएको छ।
चौथो सातामा प्रदर्शनरत फिल्ममा रमेशले 'राम सर' को भूमिकामा दर्शकको मन जित्न सफल भएका छन्। पहिलो प्रयासमै दर्शकको माया र कामको सराहना पाउँदा रमेश यतिबेला पुलकित छन्।
'यति धेरै माया पाउँछु भन्ने कल्पनासमेत गरेको थिइनँ,' सेतोपाटीसँगको कुराकानीमा उनी उत्साहित हुँदै भन्छन्, 'आफ्नो काम र मेहनतलाई दर्शकले रूचाउँदाको खुसी बेग्लै र शब्दमा व्यक्त गर्न नसकिने हुँदोरहेछ।'
फिल्म प्रदर्शनको सुरूआती दिनमा प्रतिक्रिया लिन काठमाडौंको रञ्जना हल पुग्दा उनी मनमा थोरै संकोच लिएर उभिएका थिए। 'मलाई दर्शकले चिन्लान् र?' भन्ने द्विविधाका कारण हलभित्र पस्न हच्किएका उनी जब भित्र प्रवेश गरे, माहोल सोचेभन्दा बिल्कुलै फरक बन्यो। दर्शकहरू 'राम सर' भन्दै उनीसँग झुम्मिए। कसैले आत्मीयताका साथ अंगालो हाले, कसैले तस्बिर खिचाउन अगाडि गरे। कतिपय अग्रज कलाकारहरूले समेत बोलाएर 'राम्रो काम गरेछौ' भन्दै धाप मार्दाको क्षणले रमेशलाई छुट्टै खुसी दिएको छ।
टंक बुढाथोकीको निर्देशनमा बनेको 'मन बिनाको धन' मा अभिनेत्री नीता ढुंगानासँग जोडी बाँधेका रमेशले सरोज खनाल, सन्तोष पन्त र रमेश बुढाथोकीजस्ता दिग्गज कलाकारहरूको सान्निध्यमा काम गर्ने अवसर पाए।
यद्यपि, फिल्ममा अनुबन्धित हुँदा कतिपयले उनलाई निरूत्साहित पार्ने प्रयास नगरेका होइनन्। तर, रमेशले ती कुरालाई वास्ता नगरी राम्रो काम गर्ने अठोट लिए। र, कान्तिपुर फिल्म एकेडेमीमा तीन महिनाको अभिनय प्रशिक्षण लिएर आफूलाई निखार्न खोजे।
म्युजिक भिडिओ र फिल्मको अनुभव तुलना गर्दै उनी भन्छन्, 'म्युजिक भिडिओ कम लगानी र छोटो समयमा पनि गर्न सकिन्छ, तर फिल्ममा ठूलो लगानी र धेरै लगाव चाहिनेरहेछ।'
उनले फिल्ममार्फत दर्शकहरूसँग हलमै पुगेर प्रत्यक्ष साक्षात्कार गर्न पाउनुलाई ठूलो सिकाइ र उपलब्धिका रूपमा लिएका छन्। प्रचारप्रसारका क्रममा सर्लाहीदेखि नेपालगञ्जसम्म पुग्दा दर्शकले 'तपाईंको अर्को फिल्म कहिले आउँछ?' भनी सोधेको प्रश्नले उनलाई अभिनय कर्ममा निरन्तरता दिन थप ऊर्जा मिलेको छ।
कुनै समय टिकटकमा चर्चा कमाएका र त्यहीँबाट मोडलिङमा पाइला चालेका रमेशका 'बिस्ताराले पोल्यो', 'म त रोइदिन्छु', 'माया गर्ने तरिका' जस्ता भिडिओले लाखौं भ्युज पाएका छन्। फिल्म रिलिजपछि विभिन्न ठाउँमा पुग्दा दर्शकको माया देख्दा आगामी दिनमा फिल्ममा पनि काम गरिरहूँ भन्ने लोभ जागेको उनी स्वीकार्छन्।
भविष्यको योजनाबारे उनी भन्छन्, 'अब म्युजिक भिडिओको सन्दर्भमा संख्यामा भन्दा पनि गुणस्तरमा ध्यान दिनेछु। अब अलि छनोट गरेर काम गर्ने, अझ मिहिनेत गर्ने सोचेको छु। फिल्मको पनि कुरा हुँदैछ। राम्रो लाग्यो भने काम गर्छु।'
-1746009348.jpg)
