कविताको अर्को रियालिटी शो प्रसारणको तयारीमा पुगेको छ।
यसअघि काठमाडौंबाट पहिलोपटक कविताको रियालिटी शो ‘पोएट आइडल’ बनेको थियो। अर्को रियालिटी शो ‘मेरो कविता; द रिदम अफ पोयट्री’ माघ ४ देखि झापाबाट प्रसारण हुने भएको छ।
यसलाई आयोजकले कवितामा आधारित नेपालको दोस्रो रियालिटी सो भनेका छन्।
नेपाली भाषामा कविता लेखिरहेका नयाँ प्रतिभाहरूको पहिचान विस्तारका लागि माई प्लेटफर्मद्वारा निर्माण गरिएको रियालिटी शो ‘मेरो कविता: द रिदम अफ पोयट्री’ का निर्देशन केवल क्षेत्रीले गरेका हुन् भने सहायक निर्देशकका रूपमा पबित्रा राई रहेका छन्।
डिजिटल अडिसनका लागि नेपाल लगायत विभिन्न मुलुकमा बसोबास गर्ने करिब २५० भन्दा बढी नेपाली भाषी कविहरूले सहभागी जनाएको आयोजकले जानकारी दिएका छन्।
डिजिटल अडिसनबाट छानिएका सहभागीहरूमध्येबाट विभिन्न चरणहरू पार गर्दै यतिबेला २५ कविहरू रियालिटी शो का लागि छानिएका छन्।
कार्यक्रममा सहभागी यिनै २५ प्रतियोगीहरूबीच प्रतिस्पर्धा हुनेछ। कविहरूको प्रस्तुति जाँच्ने निर्णायकका साथै दर्शकहरूले पनि आफूलाई मन परेका प्रतिस्पर्धी कविहरूलाई भोट हाल्न पाउने छन्।
अन्तिम २५ बाट हरेक हप्ता दुई जना प्रतिस्पर्धी बाहिरिने र अन्तिममा एक जना ‘मेरो कविता: द रिदम अफ पोयट्री’ को बिजेता बन्नेछ।
झापा दमकको बेलडाँगीमा छायाङ्कन भइरहेको प्रतियोगिताको निर्णायकमा कविहरू हेमन यात्री र उत्तम तुम्सा लिम्बू, गजलकार सुमन स्मारिका र अज्ञात ददी रहनेछन्। सञ्चारकर्मी सुमन कुरुम्बाङ कार्यक्रम सञ्चालकको भूमिकामा छन्। यो कार्यक्रम आयोजकको आफ्नै युट्युब च्यालन टिएनपी यूनिभर्सबाट प्रसारण हुनेछ।
-1746009348.jpg)
