केन्द्रीय चलचित्र जाँचपास समिति (फिल्म सेन्सर बोर्ड) ले नयाँ कार्यविधि 'चलचित्र जाँच तथा वर्गीकरण सम्बन्धी कार्यविधि २०८२' कार्यान्वयनमा ल्याएको छ। केहीअघि ल्याइएको कार्यविधि विवादित बनेपछि समितिले नयाँ कार्यविधि ल्याएको हो।
सेन्सर प्रक्रियामा फिल्म काँटछाँट भन्दा पनि वर्गीकरणलाई जोड दिने उद्देश्यसहित यो कार्यविधि ल्याइएको जनाइएको छ।
नयाँ कार्यविधिअनुसार अब सेन्सरले फिल्मको सेन्सर गर्दा कुन समूहका दर्शकले हेर्न पाउने भन्ने कुरामा जोड दिनेछ। कार्यविधिको बुँदा नम्बर ५ मा वर्गीकरणको विषय समेटिएको छ।
यसमा भनिएको छ, 'समितिले फिल्मको विषयवस्तु, संवाद, दृश्य तथा बालबालिका एवं किशोर-किशोरीको मानसिक स्वास्थ्यमा पर्न सक्ने प्रभाव, फिल्ममा प्रयोग भएका हिंसा, यौन दृश्य, नग्नता, लागूपदार्थ, भाषा, कथाको सन्दर्भ, उद्देश्य र कथाको मूल थिम समेतलाई ध्यानमा राखी दर्शकको उमेर अनुसार वर्गीकरण गरी फिल्मलाई सार्वजनिक प्रदर्शन गर्न देहाय बमोजिमको लोगो अंकित प्रमाण पत्र दिनुपर्नेछ।'
यही बुँदाअन्तर्गत क, ख ग र घमा फिल्मको वर्गीकरण गरिएको छ।
चलचित्र सेन्सर प्रक्रियालाई थप व्यवस्थित, पारदर्शी र झन्झटमुक्त बनाउन 'चलचित्र जाँच तथा वर्गीकरण सम्बन्धि कार्यविधि २०८२' ल्याइएको सेन्सर बोर्ड सदस्य कुबेर गिरीले बताए। सेन्सर बोर्डमा अहिले अध्यक्ष, विज्ञदेखि सबै समितिका सदस्य नयाँ भएको र फिल्मको सेन्सर समेत नयाँ तरिकाबाट हुँदै आएको गिरीको भनाइ छ।
'हाम्रो टिम आएदेखि नै फिल्मको सेन्सरमा सहज गर्दै आएका छौं', गिरीले भने 'सेन्सरमा कैंची होइन, वर्गीकरणमा जोड दिइन्छ।' पछिल्लो समय कुनै पनि फिल्ममा सेन्सरले कैंची नचलाएको गिरीको दाबी छ।
'आफ्नो फिल्म कस्तो बन्छ भनेर निर्माता निर्देशकलाई स्क्रिप्ट देखि नै थाहा हुन्छ। तर उहाँहरू एकथरी फिल्म ल्याएर एकथरी सर्टिफिकेट माग्नुहुन्छ', गिरीले भने, 'हामीले जस्तो फिल्म त्यस्तै वर्गीकरण भन्दा आफै फिल्मको यो योे सिन हटाउछु भन्दै काटेर ल्याउनु हुन्छ।'
सेन्सर सर्टिफिकेट पाएपछि बाहिर गएर सेन्सर काट्यो भनेर हल्ला फिजाउने गरेको गिरीले सुनाए। समितिले 'चलचित्र जाँच तथा वर्गीकरण सम्बन्धी कार्यविधि २०८२’ मा पुसदेखि लागू भएको ‘चलचित्र जाँच सम्बन्धी कार्यविधि २०८२' को सातौं बुँदामा रहेको 'समितिले चलचित्र जाँच गरी प्रदर्शन गर्न अधिकार प्रत्यायोजन गरेको अवस्थामा बाहेक समितिबाट जाँचपास भएका चलचित्र मात्र महोत्सवमा प्रदर्शन गर्न पाइनेछ' लाई पनि हटाएको छ।
समितिको नयाँ कार्यविधिले सेल्फ सेन्सर पद्धतिलाई पनि जोड दिएको छ। फिल्मकर्मीलाई सेन्सर गर्न सजिलो होस् भनेर स्वयंले जाँच गर्ने (सेल्फ सेन्सर) पद्धतिअगाडि बढाइएको हो। त्यसका लागि बोर्डले एउटा फारमको समेत व्यवस्था गरेको छ। जसबाट चलचित्रकर्मीले आफ्नो फिल्ममा सेन्सरबाट देखिने त्रुटि आफैंले पत्ता लगाउन सक्नेछन्।
सेल्फ सेन्सर अन्तर्गत रहेर चलचित्रकर्मीले आफ्नो फिल्म बुझाउँदा फिल्म सेन्सर सहज हुने र चलचित्रकर्मीले व्यहोर्नुपर्ने विभिन्न झन्झटबाट मुक्त भई सेन्सर बोर्ड र चलचित्रकर्मी दुवैको समय बचत हुने विश्वास रहेको बोर्ड सदस्य गिरीले बताए।
-1746009348.jpg)
