माघ १ देखि १० गतेसम्म सञ्चालनमा रहेको क्वियर फिल्म फेस्टिभल काठमाडौंले विश्वका विभिन्न मुलुकबाट छानिएका प्रशंसित क्वियर फिल्महरूको विशेष प्रस्तुति गरिरहेको छ।
फेस्टिभलको उद्घाटन 'क्वियर एज पंक' फिल्ममार्फत गरिएको थियो, जुन यसअघि बर्लिनाले र आईडीएफए (इन्टरनेशनल डकुमेन्ट्री फिल्म फेस्टिभल एम्स्टर्डाम) जस्ता प्रतिष्ठित अन्तराष्ट्रिय महोत्सवहरू प्रदर्शन भएको थियो। यस फेस्टिभलमार्फत प्रस्तुत गरिएका फिल्महरू समाजले क्वियर अनुभवलाई बुझ्न महत्वपूर्ण मानिन्छन्।
फिल्म प्रदर्शनसँगै, फेस्टिभलले क्वियर दृष्टिकोण र दृश्य माध्यमसम्बन्धी ज्ञान अभिवृद्धि गर्ने उद्देश्यले विभिन्न कार्यशालाहरू पनि आयोजना गरेको थियो। फिल्म समीक्षक र फिल्मप्रेमीहरूका लागि विशेष रूपमा सिनेमामा क्वियर लेन्स विषयमा कार्यशाला सञ्चालन गरिएको थियो। यसका साथै एडोब लाइटरूम र डाभिन्ची रिजोल्भको परिचय तथा सहभागितामूलक भिडियो कार्यशालामार्फत दृश्य माध्यमको प्राविधिक पक्ष र यसलाई अधिकारकर्मी औजारका रूपमा प्रयोग गर्ने तरिकाबारे सिक्ने अवसर प्रदान गरिएको थियो।
आगामी दिनहरूमा 'भेल्भेट भिजन', 'माइ चेस्ट इज फुल अफ स्पाक्र्स', 'ट्रान्स युनिभर्सल', 'स्विमिङ अगेंस्ट द करेन्ट', 'मोइराइ', 'प्लेइङ अराउन्ड' र 'कल मी एग्नेस' जस्ता वृत्तचित्रहरू पनि प्रदर्शन हुने छन्। यी फिल्महरू यसअघि फेस्टिभल दे मालागा, नेदरल्यान्ड्स फिल्म फेस्टिभल, डोकुडेज फिल्म फेस्टिभल र आउटसाउथ क्वियर फिल्म फेस्टिभलजस्ता प्रतिष्ठित अन्तर्राष्ट्रिय महोत्सवहरूमा प्रदर्शित भइसकेका छन्।
सबै फिल्मको प्रदर्शन थापाथलीस्थित एयरावत पिक्चर हाउसमा भइरहेका छन् भने सोही स्थानको हल बी मा विभिन्न बहुविषयका छोटा फिल्महरू प्रदर्शन भइरहेका छन्।
यसपालिको संस्करणले ह्युमन राइट्स ट्याटुसँग सहकार्य गर्दै विशेष कार्यक्रम पनि आयोजना गरिएको छ।
उक्त कार्यक्रममा सहभागीहरूले मानव अधिकारको विश्वव्यापी घोषणापत्रका निश्चित धाराहरूका अक्षरहरूलाई ट्याटुमार्फत आत्मसात गर्नेछन्। यो कार्यक्रम माघ ९ र १० गते सञ्चालन हुनेछ।
-1746009348.jpg)
