चार बैंकको घट्यो ब्याजदर, कुनमा पाइन्छ बढी?

सेतोपाटी संवाददाता

काठमाडौं, भदौ ३२

असोज महिनाका लागि वाणिज्य बैंकहरूले ब्याजदर थप घटाएका छन्।

सञ्चालनमा रहेका २० वाणिज्य बैंकले सार्वजनिक गरेको ब्याजदर अनुसार साउनको तुलनामा असोजमा निक्षेपको ब्याजदर घटेको हो।

१६ बैंकले व्यक्तिगत निक्षेपमा दिने अधिकतम ब्याजदर स्थिर राखेका छन्। ४ वटा बैंकले ब्याजदर घटाएका छन्। यिनमा कुमारी, नबिल, एभरेष्ट र स्ट्याण्डर्ड चार्टर्ड बैंक छन्।

असोजमा वाणिज्य बैंकहरूबाट व्यक्तिगत मुद्दतीमा अधिकतम ब्याजदर अधिकतम ४.५५ प्रतिशत ब्याज पाइने भएको छ। प्रभु बैंकले सबैभन्दा धेरै ब्याजदर दिने भएको हो। भदौमा औंसत ब्याजदर ४.१३ प्रतिशत रहेकोमा असोजमा यस्तो औंसत ब्याजदर ४.०८ प्रतिशत छ।

कुमारी बैंकबाट सबैभन्दा कम ३.७३ प्रतिशत मात्रै ब्याजदर पाइने भएको हो।

बैंकहरूले रेमिटेन्स खातामा भने व्यक्तिगत मुद्दति खातामा भन्दा एक प्रतिशत बढी ब्याज दिन्छन्। लामो समयदेखि नै बैंकहरूसँग कर्जा लगानी योग्य रकम उच्च भएपछि बैंकहरूको ब्याजदर घटिरहेको छ ।

हाल बैंकहरूसँग करिब १५ खर्ब भन्दा धेरै कर्जा दिन मिल्ने रकम रहेको छ।

कर्जा नगएपछि पछिल्लो समय बैंकहरूले तीन प्रतिशत र २.५० प्रतिशत ब्याजदरमा राष्ट्र बैंकमा लगेर पैसा राखिरहेका छन्। यसरी १३ खर्ब ६१ अर्ब रूपैयाँ राखेका छन्।

अहिले बैंक तथा वित्तीय संस्थाहरूसँग ८३ खर्ब ३८ अर्ब रूपैयाँ निक्षेप संकलन छ भने यसमध्ये ५९ खर्ब ९८ अर्ब कर्जा लगानी गरेका छन्।
मासिक रुपमा दुई खर्बभन्दा बढी रेमिटेन्स भित्रिरहेकोले पनि बैंकहरूमा निक्षेप बढेको हो।

बैंक	असोजकोलागि ब्याजदर (प्रतिशत)	भदौको लागि ब्याजदर (प्रतिशत)
कृषि विकास	४.१५	४.१५
एभरेष्ट	३.५	४.०५
नेपाल	४.१५	४.१५
लक्ष्मी सनसाइज	४.	४.
माछापुच्छ्रे	४.५	४.५
एनआइसी एसिया	४	४
प्रभु	४.५५	४.५५
स्ट्याण्डर्ड चार्टर्ड	३.७५	३.८
राष्ट्रिय वाणिज्य	४	४
नबिल	४.२५	४.५५
ग्लोबल आइएमई	४.	४.
नेपाल इन्भेष्टमेन्ट मेगा बैंक	४.५	४.५
सिद्धार्थ	३.७६	३.७६
प्राइम कमर्सियल	४.	४.
कुमारी	३.७३	३.७६
सानिमा	४.५	४.५
हिमालयन	४	४.
नेपाल एसबिआई	४.१	४.१
एनएमबी	४.५	४.५
सिटिजन्स	३.८५	३.८५
औसत	४.०८९५	४.१३६