विश्व बैंक समूहले आर्थिक वर्ष २०२६ मा नेपाल सहित विकासशील देशमा हालसम्मकै धेरै निजी पुँजी परिचालन गरेको जनाएको छ।
समूहले एक वर्षमा ११२ अर्ब अमेरिकी डलर निजी पुँजी परिचालन गरेको जानकारी गराएको हो।
चार वर्षअघि आर्थिक वर्ष २०२२ मा यस्तो पुँजी ३५ अर्ब डलर थियो। चार वर्षमा यो तीन गुणाभन्दा बढी बढेको हो।
विश्व बैंक समूहको आफ्नै वित्तीय स्रोत समेत जोड्दा विकासशील देशमा कुल वित्तीय स्रोत तथा परिचालन २०० अर्ब डलरभन्दा बढी पुगेको छ।
न्यून-मध्यम आय भएका देशमा निजी पुँजी परिचालन १४ अर्ब डलरबाट बढेर ३७ अर्ब डलर पुगेको छ। उच्च-मध्यम आय भएका देशमा १२ अर्बबाट बढेर ५० अर्ब डलर पुगेको विश्व बैंक समूहले जानएको छ।
न्यून आय भएका देशमा भने निजी पुँजी परिचालन करिब ३ अर्ब डलरमा कायम रहेको छ। अफ्रिकामा निजी पुँजी परिचालन ९ अर्ब डलरबाट बढेर २२ अर्ब डलर पुगेको छ।
विश्व बैंक समूहले आर्थिक वर्ष २०२६ मा २५ अर्ब डलरभन्दा बढीको गारन्टी जारी गरेको छ। सन् २०३० सम्म वार्षिक २० अर्ब डलर गारन्टी जारी गर्ने लक्ष्य चार वर्षअघि नै पूरा भएको हो।
विश्व बैंक समूहका अध्यक्ष अजय बाङ्गाले निजी पुँजी परिचालनलाई रोजगारी सिर्जनासँग जोड्नुपर्ने बताएका छन्।
विकासशील देशमा आगामी १० देखि १५ वर्षमा १ अर्ब २० करोड युवा काम गर्ने उमेरमा पुग्ने अनुमान छ। सो अवधिमा करिब ४२ करोड रोजगारी मात्र सिर्जना हुने प्रक्षेपण छ। विकासशील देशमा १० मध्ये नौ रोजगारी निजी क्षेत्रले सिर्जना गर्छ।
विश्व बैंक समूहले पूर्वाधार तथा ऊर्जा, कृषि व्यवसाय, स्वास्थ्य, पर्यटन र मूल्य अभिवृद्धि उत्पादनलाई रोजगारी सिर्जनाका प्रमुख क्षेत्र मानेको छ।
आर्थिक वर्ष २०२६ मा समूहको कुल वित्तीय स्रोत र परिचालित पुँजीको ५५ प्रतिशत यी क्षेत्रमा गएको छ।
विश्व बैंक समूहले निजी लगानी बढाउन व्यावसायिक तथा नियामकीय वातावरण सुधार, गारन्टी विस्तार, स्थानीय मुद्रामा वित्तीय स्रोत र विदेशी विनिमयसम्बन्धी चुनौती सम्बोधनमा काम गरिरहेको जनाएको छ।
समूहले संस्थागत लगानीकर्तालाई समेत विकासशील देशका लगानीका अवसरमा ठूलो परिमाणमा सहभागी गराउने उपाय विकास गरिरहेको जनाएको छ।
-1746009348.jpg)
