म एक्लो तन लिएर
नयाँ भर्खर बन्दै गरेको सडकमा
बामे सर्न सिक्दैछु।
सानो बालक त हैन
तर म सानो बालक नै हुँ
किनकि,
मेरो यहाँ बोली बिक्दैन
बाँकी गर्न खोज्दा भोलि टिक्दैन
मेरो मन झुटको खेती जुटको खेती जसरी
नेताको झोला भएर गर्न सिक्दैन
त्यसैले त म बामे सर्न सिक्दैछु
सानो बालक त हैन म
तर,
म सानो बालककै मोलमा बिक्दैछु
यहाँ
कालो-कालोमा अन्यायपूर्ण व्यवहार गरिन्छ
कालो त्यो अलकत्रा मान्छे गधा सबैले किच्ने भुइँमा दलिन्छ।
कालो नै हो त्यो शालिग्राम तर त्यसको चन्दन अक्षता फूलका साथ पूजा गरिन्छ।
त्यसैले,
म अझै बामे सर्न सिक्दैछु।
सानो बालक त हैन म
तर म सानो बालककै मोलमा बिक्दैछु।
यहाँ
अन्यायको छाप्रोमा बसेर
हर्के दाइले बाकसभित्र न्यानोका लागि ओढेको कात्रो चोर्ने न्यायाधीश पुजिन्छ
खाली मैदानमा सपना कोर्ने एउटा कलाकार कुजिन्छ।
त्यति मात्र कहाँ हो र महासय
उखान टुक्का र व्यङ्ग्य सुन्दै महान् वाणी भन्दै ताली गुन्जिन्छ।
त्यसैले,
यस्ता कुराहरू बुझ्न म शब्द सिक्दैछु।
सानो बालक त हैन म
तर म सानो बालककै मोलमा बिक्दैछु।
यहाँ
नारीको अस्मिता बिर्सिएर रात मोल तोकिन्छ
महिलालाई मैला हो भनी
रातारात गल्ली गल्लीमा टोकिन्छ
आमा, दिदीबहिनी केही सम्बन्ध छैन यहाँ
काला मैलायुक्त शब्द वाणले ठोकिन्छ
त्यसैले म तोक्ने टोक्ने र ठोक्नेलाई झिक्दैछु
सानो बालक त हैन म
तर म सानो बालककै मोलमा बिक्दैछु।
-1756446574.jpg)
-1746009348.jpg)
