लालपूर्जा पाउँदा हाकुबासी दंग

सेतोपाटी संवाददाता

रसुवा, जेठ २३

रसुवाको पार्वतीकुण्ड गाउँपालिका वडा नं १ र २ हाकुका गाउँलेहरुलाई लालपूर्जा वितरण अभियान सुरु भएको छ । असहाय वालवालिका विकास केन्द्र हाकुको अगुवाईमा गाउँलेको लालपूर्जा बनाएर वितरण गर्न सुरु गरिएको हो ।

केन्द्रका अध्यक्ष ङवा तामाङका अनुसार आइतबार ६० जनालाई लालपूर्जा वितरण गरियो । हाकुका ३ सय भन्दा बढी गुठि पीडित परिवारलाई लालपूर्जा वितरण गर्ने योजना छ । पुरानो स्वयम्भू घ्याङ गुठीको नाउँमा रहेको जग्गाका मोही हाकुका बासिन्दा हुन् । गुठी, मालपोत कार्यालय र गाउँलेसँग मिलेर लालपूर्जा वितरणलाई अघि बढाइएको तामाङले बताए ।

गुठीलाई कुत रकम तिर्न अष्ट्रियाको ‘स्टेप जिरो प्वाइन्ट वान’ नामक संस्थाले सहयोग गरेको छ । उसले हिमालय पिस एजुकेशन फाउन्डेशन मार्फत पठाएको रकम आइतबार धुन्चेमा आयोजित कार्यक्रममा फाउन्डेशनका अध्यक्ष राजेन्द्र लामाले गाउँलेलाई हस्तान्तरण गरे । गुठी पीडित सबैले रकम पाउनेछन् ।

प्रमूख जिल्ला अधिकारी चोमेन्द्र न्यौपानेले लालपूर्जा वितरण शुभारम्भ गरेका थिए । हाकुका गाउँले भुकम्प पिडित हुन् । जग्गाको लालपूर्जा नपाएकाले उनीहरुले सरकारबाट घर बनाउन राहत रकम पाएका थिएनन् । अब पूर्जा पाएपछि रकम लिन सजिलो हुने छ ।