समाजवादी पार्टीकी संसदीय दल उपनेता सरिता गिरीले कोरोना संक्रमणको प्रयोगशाला स्थापना गर्दा सरकारले प्रदेश नम्बर २ लाई बेवास्ता गरेको भन्दै आपत्ति जनाएकी छन्। प्रदेश नम्बर २ मा सबैभन्दा बढी जनघनत्व भएकाले त्यहाँ तत्काल प्रयोगशाला खोल्नुपर्ने माग उनको छ।
समाजवादी पार्टीको संसदीय दल उपनेता सरिता गिरीले प्रेश विज्ञप्ति जारी गर्दै प्रयोगशाला स्थापना लगायतका पाँच वटा माग गरेकी हुन्।
'प्रदेश नम्बर २ को बेवास्ता सरकारले गरेको छ जुन निन्दनीय छ। प्रदेश २ सबभन्दा बढी जनघनत्व भएको र सबैभन्दा गरिब प्रदेश हो। महामारीको समयमा डाक्टर, स्वास्थ्यसेवा सामाग्री र दवाई गरिब प्रदेशका उपलब्ध गराउनुपर्नेमा बेवास्ता गरेको छ,' गिरीले जारी गरेको विज्ञप्तिमा भनिएको छ, 'सरकारले तत्काल प्रत्येक प्रदेशमा एउटा टेस्ट सेन्टरको स्थापना गरी छिट्टै प्रत्येक जिल्लाहरूमा पनि यो स्थापना गर्नुपर्छ। त्यस्तै सबै ठाउँमा स्वास्थ्यकर्मीहरूका लागि पीपीईको पनि व्यवस्था गरिनुपर्छ।'
सरकारले लगाएको लकडाउनलाई भने समर्थन गर्ने उनले जनाएकी छन्।
त्यस्तै चीनले उपलब्ध गराउने भनेका कोरोना भाइरसको संक्रमणका बेला चाहिने स्वास्थ्य सामाग्री सरकारले कसरी वितरण गरेको छ त्यसको जानकारी गराउन गिरीले माग गरेकी छन्।
प्रेस सम्मेलनमार्फत त्यसको जानकारी गराउन पनि सरकारसँग उनको माग छ।
'मित्रराष्ट्र चिनबाट भर्खरै के कस्तो सामाग्री प्राप्त भएको हो र देशभरी त्यसको वितरण र व्यवस्थापन सरकारले कसरी गराइरहेको छ, प्रेस सम्मेलनमार्फत तुरून्त जानकारी गराओस,' उक्त विज्ञप्तिमा उल्लेख छ, 'डब्लुएचओ लगायतका संघसंस्थाबाट प्राप्त भएको आर्थिक र स्वास्थ्य सामाग्रीको सहयोग, त्यसको खर्च र वितरणको योजना बारे जानकारी जनतालाई नियमितरूपमा गराओस।'
संसदको बैठक हुन नसकेको अवस्थामा कोरोना संक्रमण नियन्त्रणका लागि संचित कोषबाट कति रकम कसरी खर्च गर्ने योजना छ भन्नेबारे जनतालाई जानकारी गराउन पनि उनले माग गरेकी छन्।
