२०७९ को निर्वाचनमा माओवादीले नेपाली कांग्रेससँगको गठबन्धनका बलमा प्रत्यक्षतर्फ १८ सिट जित्दा समानुपातिकतर्फ ६ ठाउँमा मात्र पहिलो भएको थियो।
त्यसैमध्ये एउटा हो, सर्लाही क्षेत्र नम्बर ३।
यसपालि त्यही क्षेत्रमा नेपाली कम्युनिस्ट पार्टी (नेकपा) का वरिष्ठ नेता नारायणकाजी श्रेष्ठ उम्मेदवार बनेका छन्।
सर्लाही–३ मा तत्कालीन माओवादी (हालको नेकपा) ले १५ हजार ४ सय ७१ मत ल्याउँदा दोस्रो स्थानमा रहेको एमालेले १५ हजार ६ मत ल्याएको थियो। त्यस्तै, जसपाले १२ हजार ७९, कांग्रेसले ९ हजार ९ सय ७९, रास्वपाले ६ हजार ९ सय ६२ र जनमत पार्टीले ६ हजार ९ सय ३१ मत पाएका थिए।
गठबन्धनका कारण यो क्षेत्र माओवादीको भागमा परेको भए पनि उसका उम्मेदवार पराजित भएका थिए। यहाँ एमाले–जसपा गठबन्धनबाट एमाले उम्मेदवार हरिप्रसाद उप्रेती विजयी भए।
उप्रेतीले ३२ हजार ९ सय ३८ मत ल्याउँदा माओवादी उम्मेदवार नरेन्द्र साह कलवारले ३२ हजार १ सय ६८ मत ल्याए।
त्यति बेला कांग्रेस–माओवादी गठबन्धनलाई हराएका उप्रेती नै अहिले यहाँ एमालेका उम्मेदवार छन्।
माओवादीबाट उम्मेदवार बनेका कलवार भने यसपालि राष्ट्रिय स्वतन्त्र पार्टी (रास्वपा) बाट चुनाव उठेका छन्।
माओवादीसँगको गठबन्धनका कारण २०७९ मा कांग्रेसले उम्मेदवारी दिएको थिएन। यसपालि कांग्रेसले विनोद कुमार खनाललाई उम्मेदवार बनाएको छ।जसपाबाट जयप्रकाश राय उठेका छन्।
यसअघि २०७० मा मकवानपुर–१ र २०७४ मा गोरखा–२ बाट चुनाव लडेका नारायणकाजी श्रेष्ठ दुवै पटक पराजित भएका थिए। पहिलो संविधानसभामा तत्कालीन जनमोर्चा कोटाबाट मन्त्रिपरिषदको सिफारिसमा सांसद बनेका उनी माओवादीसँगको एकतापछि पटक पटक सरकारमा गइसकेका छन्।
२०६९ सालमा झलनाथ खनालको नेतृत्वमा रहेको सरकारमा केही दिन उपप्रधान तथा गृहमन्त्री भएका श्रेष्ठ बाबुराम भट्टराई नेतृत्वको सरकारमा उपप्रधान तथा परराष्ट्र मन्त्री बनेका थिए।
२०७६ सालमा राष्ट्रियसभा सांसद बनेका श्रेष्ठ २०७९ मा पुष्पकमल दाहाल 'प्रचण्ड' नेतृत्वको सरकारमा उपप्रधान तथा गृहमन्त्री र केही समय परराष्ट्रमन्त्री भएका थिए।
श्रेष्ठले यसपालि सर्लाही–३ रोज्नुको मुख्य कारण त्यस क्षेत्रमा रहेको पार्टीको प्रभाव नै हो।
यो निर्वाचन क्षेत्रमा हरिवन नगरपालिका, बागमती नगरपालिका, चक्रघट्टा नगरपालिका, बरथहवा नगरपालिका, कविलासी नगरपालिका, बसबरिया गाउँपालिका र हरिपुर नगरपालिकाका वडाहरू पर्छन्।
यो क्षेत्रमा पर्ने प्रमुख दुई नगरपालिका बागमती र हरिवनमा माओवादीले मेयर जितेको छ। बागमतीमा २०७४ र २०७९ को दुवै निर्वाचनमा भरतकुमार थापा विजयी भएका थिए।
हरिवन नगरपालिकामा भने थोरै मतको अन्तरले २०७९ मा रमेश बुढाथोकी मेयर निर्वाचित भएका थिए।
रोचक पक्ष के छ भने, हरिवन नगरपालिकामा मेयर जितेको माओवादीले त्यहाँका एउटै वडामा पनि विजय हासिल गरेन। बागमती नगरपालिकामा भने १२ मध्ये १० वटा वडा माओवादीले जितेको थियो।
यो निर्वाचन क्षेत्रमा पर्ने ५१ मध्ये कांग्रेस र माओवादीले १५–१५, एमाले र जसपाले ९–९, एकीकृत समाजवादीले २ र बहुजन पार्टीले एउटा वडा जितेका थिए।
थापा र बुढाथोकी दुवै जनमोर्चा पृष्ठभूमिका नेता हुन्।
यो क्षेत्रमा माओवादी भित्र पनि जनमोर्चा लिगेसी बोक्नेहरुको प्रभाव बलियो छ। त्यही भएर पनि श्रेष्ठको नजर सर्लहीमा परेको हुन सक्छ। यसअघि पनि उनी सर्लाही जाने चर्चा चलेको थियो।
त्यस्तै नेकपा एमालेबाट विभाजन भएर बनेको नेकपा एकिकृत समाजवादीको पनि धेरथोर प्रभाव छ। नेकपा एकिकृत समाजवादी पनि नेकपामै समाहित भएकाले आफूलाई केही फाइदा पुग्ने श्रेष्ठको आकलन हुन सक्छ।
२०७४ को निर्वाचनमा तत्कालीन एमालेको गठबन्धनबाट माओवादीका उमेदवार रामेश्वर राय यादव यही क्षेत्रबाट भारी मतले विजयी भएका थिए। रायले २२ हजार ३६७ मत ल्याउँदा कांग्रेसका हरेश प्रशाद महतोले १४ हजार ९ सय २९ मत मात्र ल्याएका थिए।
यसपालि पनि सर्लाही-३ बाट नारायणकाजीसँगै यादवको नाम पनि उम्मेदवारका लागि सिफारिस गरेको थियो। नारायणकाजी सर्लाही-३ जाने भनेपछि असन्तुष्ट रहेका यादवलाई संयोजक पुष्पकमल दाहाल 'प्रचण्ड', सह-संयोजक माधवकुमार नेपालले पेरिसडाँडामै बोलाएर छलफल गरेका थिए।
नारायणकाजी जाने भएपछि उनी अहिले जसपाबाट सर्लाही-४ को उम्मेदवार बनेका छन्।
श्रेष्ठ उमेदवार बनेको क्षेत्रमा माओवादीको सबैभन्दा बलियो पकड भएको ठाउँ भने बागमती नगरपालिका हो।
बागमतीमा कृत्रिम ताल बनाएर मधेसकै पर्यटकीय क्षेत्र बनाएको जस मेयर भरत थापालाई जान्छ। यसको केही फाइदा श्रेष्ठलाई हुन सक्छ।
मेयर थापा भने भ्रष्टाचार प्रकरणका कारण निलम्बनमा छन्।
-1746009348.jpg)
