पछिल्लो समय सरकारले कोरोना भाइरसको रोकथाम, नियन्त्रण र उपचारका लागि चाहिने स्वास्थ्य सामग्री ल्याउने जिम्मा नेपाली सेनालाई दिने चर्चा भइरहेको छ।
बिहीबार स्वास्थ्य सेवा विभागका महानिर्देशक महेन्द्र श्रेष्ठले चीनबाट जीटुजीमार्फत् औषधि ल्याउने र त्यसको जिम्मेवारी सेनालाई दिने तयारी भइरहेको बताएका थिए।
स्वास्थ्य सामग्री खरिद गर्न सरकारले रक्षा मन्त्रालयसँगको समन्वयमा नेपाली सेनालाई दिने तयारीको पूर्वप्रधानमन्त्रीदेखि विभिन्न पार्टीका नेताहरूले विरोध गरेका छन्।
सत्तारूढ र प्रतिपक्षी दलका नेताहरूले स्वास्थ्य सामग्री खरिदमा सेनालाई अघि सार्न नहुने बताएका हुन्।
पूर्वप्रधानमन्त्रीसमेत रहेका समाजवादी पार्टी नेपालका संघीय परिषद अध्यक्ष बाबुराम भट्टराईले निजामती निकाय हुँदाहुँदै सेनालाई किन स्वास्थ्य सामग्री खरिदका लागि अघि सारिएको भन्ने प्रश्न गरेका छन्।
भट्टराईले ट्वीट गर्दै जीटुजी विधिबाट पहिले किन सामान नल्याएको भन्ने प्रश्न सरकारलाई गरेका छन्।
‘भाइरस मार्ने बन्दुक र गोलीले हैन होला,’ भट्टराईले ट्विटरमा लेखेका छन्,‘अनि सरकारले किन चीनबाट स्वास्थ्य सामग्री किन्न सेनालाई अघि सारेको होला? के वाणिज्य, आपूर्तिलगायत निजामति निकाय छैनन्?’
सेनाबाट सामग्री खरिद गर्दा अख्तियारको क्षेत्राधिकार पर्दैन भनेर सरकारले चलाखी गरेको हुन सक्ने पनि भट्टराईको भनाइ छ।
‘जीटुजी विधिबाट पहिल्यै किन नल्याएको? के सेना अख्तियारको दायरामा पर्दैन भनेर हो? चोरको खुट्टा काट् भन्दा किन खुट्टा तानेको?’ भट्टराईले प्रश्न गरेका छन्।
पूर्वउपप्रधानमन्त्रीसमेत रहेका राष्ट्रिय प्रजातन्त्र पार्टी राप्रपाका अध्यक्ष कमल थापाले सार्वजनिक खरिद बिक्रीको काममा सेनालाई प्रयोग गर्न नहुने बताएका छन्।
‘सार्वजनिक खरिद बिक्रीको काममासमेत सेनालाई प्रयोग गर्नु उपर्युक्त हुँदैन,’ थापाले ट्वीट गर्दै भनेका छन्, ‘सेनाले पनि त्यस्तो जिम्मेवारी स्वीकार गर्नु हुँदैन।’
सेनालाई स्वास्थ्य सामग्री खरिद गर्न दिँदा सरकारको नियमित कार्य क्षमतामा ह्रास आएको र असक्षम भएको प्रमाणित गर्ने पनि थापाको भनाइ छ।
‘त्यसले सरकारको नियमित कार्य क्षमतामा ह्रास आएको र असक्षम भएको प्रमाणित गर्दछ। मलाई लाग्दैन हामी त्यो अवस्थामा पुगिसकेका छौं,’ थापाले भनेका छन्।
सत्तारूढ नेपाल कम्युनिष्ट पार्टी नेकपाका केन्द्रीय सदस्य विष्णु रिजालले सेनालाई यस्ता खालका जिम्मेवारी दिँदा प्रणाली कमजोर हुने उल्लेख गरेका छन्।
‘हुरीबतास आयो, घर बनाउने जिम्मा सेनालाई। महामारी आयो, औषधी किन्ने जिम्मा सेनालाई। ठूलो बजेट भयो, बाटो बनाउने जिम्मा सेनालाई,’ उनले गरेको ट्वीटमा भनिएको छ, ‘यो सेनाको यो कामै होइन। सेनामा अख्तियारले हेर्न नपाउने भएकाले लिने-दिने दुबैलाई राम्रै लाग्ला तर हाम्रो प्रणाली कमजोर हुन्छ। दीर्घकालीन रूपमा सोचौँ।’
प्रमुख प्रतिपक्षी नेपाली कांग्रेसका केन्द्रीय सदस्य प्रदीप पौडेलले पनि स्वास्थ्य सामग्री खरिद गर्ने जिम्मा सेनालाई दिन नहुने बताएका छन्। उनले वर्तमान सरकार नै विश्वासको संकटमा परेको आरोप लगाएका छन्।
‘ब्रमलुट गर्नेहरूबाट जनताको स्वास्थ्य सुरक्षा कसरी हुन्छ? विपतको नेतृत्व गर्ने सरकार विश्वासको संकटमा परेको छ,’ उनले गरेको ट्वीटमा भनिएको छ, ‘मन्त्रिमण्डल नै विचौलियाहरूको समूहजस्तो देखिन्छ। फेरि सेनालाई दिने निर्णय? प्रधानमन्त्रीज्यू, तपाईंमाथि भरोसा राख्नलाई उपप्रधानमन्त्री ईश्वर पोखरेल र स्वास्थ्य मन्त्री भानुभक्त ढकाललाई तत्काल पदबाट बर्खास्त गर्नुस्।’