ट्राभलर सिर्जना सिज्जुले प्रतिनिधि सभा निर्वाचनका लागि समानुपातिक सूचीबाट आफ्नो नाम फिर्ता लिएको घोषणा गरेकी छन्।
बुधबार फेसबुकमा स्टाटस लेखेर सिज्जुले राष्ट्रिय स्वतन्त्र पार्टीले बुझाएको समानुपातिक सूचीबाट आफ्नो नाम फिर्ता लिने घोषणा गरेकी हुन्।
उनी काठमाडौं महानगरपालिकाका मेयर बालेन्द्र शाहको टिमबाट राष्ट्रिय स्वतन्त्र पार्टीको समानुपातिक बन्द सूचिमा परेकी थिइन्।
समानुपातिक उम्मेदवार बन्नका लागि बालेनको टिमबाट प्रस्ताव आउँदा आफू यात्रामै रहेको र सोचविचारै नगरी स्वीकृति दिएको भन्दै उनले नाम फिर्ता लिने निर्णयमा पुगेको बताएकी छन्।
‘कुनै पार्टीलाई योगदान दिएको कारण होइन, देशलाई पर्यटन क्षेत्रमा थोरै भए पनि योगदान गरेको कारण मेरो नाम टिम बालेनबाट रास्वपामा सिफारिस भएको हो । यही कुरा टिमका सदस्यहरूले पनि भन्नुभएको थियो। यसका लागि म आभारी छु,’ उनले लेखेकी छन्, ‘नयाँ आउने सबैलाई शुभकामना। तर मैले मेरो नाम फिर्ता लिइसकेकी छु। यात्रामा भएकाले र प्राविधिक समस्याले गर्दा जानकारी दिन केही दिन ढिला भयो।’
उनी अगाडि लेख्छिन्, ‘मेरा प्यारो शुभचिन्तकहरू, तपाइँहरूको सदासयतालाई मेरो सम्मान छ । तर अहिले मलाई राजनीतिमा आउन दबाब नदिनुहोस् । कृपया मैले गरिरहेकै कर्ममा साथ दिनुहोस्। जब सबथोक सही हुन्छ, कुनै समय, सायद तपाईंले सोचेको जस्तै पनि हुनेछ।’
आवश्यक परेको खण्डमा आफूहामी राजनीति बाहिर बसेर पनि आफ्नो दक्षता अनुसार सधैं काम गर्न तयार रहेको पनि उनले बताएकी छन्।
नयाँ बन्ने पर्यटन मन्त्रीले देशको जिडिपि पर्यटनबाट दोब्बर बनाउने लक्ष्य लिएर आउन सुझाएकी छन्।
‘पर्यटनले रोजगारी छिटो सिर्जना गर्छ र ग्रामीण अर्थतन्त्रसँग जोडिन्छ । हाम्रो देशको आर्थिक पाटो बलियो बनाउने सबैभन्दा ठोस आधार पर्यटन नै हो भन्ने कुरामा दुईमत छैन। हामी पनि आउँदा दिनमा पर्यटन क्षेत्रलाई अझ सशक्त बनाउने दिशामा निरन्तर लाग्नेछौँ ,’ उनले लेखेकी छन्।
पुरानालाई गाली गर्नु र नयाँलाई वाह–वाह गर्नु अबको एजेन्डा हुन नहुने पनि उनले सुझाव दिएकी छन्।
'नेतालाई गाली गरेर चुनाव लड्नु, तर आफ्नै एजेन्डा नहुनु त्यसले केही बदलिँदैन। सामाजिक सञ्जालका एजेन्डाले हुम्ला, जुम्ला, डोल्पा जाजरकोट मनाङ मुस्ताङ कर्णाली, सुदूर, कञ्चनजंघा, ताप्लेजुङसम्म काम गर्छन् कि गर्दैनन् यो बुझ्न जरूरी छ। राजनीति रहरले मात्र, राज्यसत्ताको पावरले मात्र हुने कुरा होइन,' उनले भनेकी छन्, 'आत्तिनुभएको छ भने नअत्तिनुहोस् । म अहिले राजनीतिमा आउँदिन। तर यसको अर्थ यो होइन कि म राजनीति बुझ्दिनँ, गर्न सक्दिनँ, वा मसँग भिजन छैन।'
उनीसँगै रास्वपाको बन्द सूचिबाट नाम फिर्ता लिनेको संख्या ७ पुगेको छ।
-1756446574.jpg)
-1746009348.jpg)
