बेइजिङ डायरी
'नव वर्षको सूर्योदय हुनै लागेको छ। मातृभूमिको पहाड तथा नदी भव्य र सुन्दर हुने, जमिन उर्वर हुने र देश समृद्धिको घामले ढाकिने कामना गर्छु। सबैको जीवनमा खुसियाली छाओस्, कार्य सफलता र मनका इच्छा पूरा होऊन्।'
चिनियाँ राष्ट्रपति सी चिनफिङले डिसेम्बर ३१ को साँझ चीनका सबै सञ्चार माध्यमबाट नयाँ वर्ष सन् २०२६ को शुभकामना दिँदा उक्त भनाइ राखेका हुन्।
हरेक वर्ष चिनियाँ राष्ट्रपति सी चिनफिङले डिसेम्बर ३१ को साँझ नयाँ वर्षको शुभकामना दिन्छन्। उनले शुभकामना दिँदा लगभग ९ मिनेट बोलेका थिए।
ग्रेटवालको चित्र अंकित विशाल चित्रका अगाडि दाहिनेतिर पाँचतारे चिनियाँ राष्ट्रिय झन्डा राखेर फरर बोल्दै सी चिनफिङले दिएको नयाँ वर्ष सन् २०२६ को सन्देश चीनका एक हजारभन्दा बढी विभिन्न सञ्चार माध्यमले एकैचोटि प्रत्यक्ष प्रसारण गरेका थिए।
सी चिनफिङले शुभकामना सन्देश दिँदा चीनको विकास र कूटनीति पनि प्रस्तुत गर्ने भएकाले उनको सन्देशलाई विश्वभर चासोका साथ हेरिन्छ।
सन् २०२५ चीनमा चौधौं पञ्चवर्षीय योजनाको अन्तिम वर्ष हो। नयाँ वर्षसँगै चीनमा पन्ध्रौं पञ्चवर्षीय योजनाको अवधि सुरू हुँदैछ।
चीनले चौधौं पञ्चवर्षीय योजनाका लक्ष्यहरू समयभन्दा पहिल्यै प्राप्त गरेकाले अब महत्त्वाकांक्षी पन्ध्रौं पञ्चवर्षीय योजनालाई सी चिनफिङले निकै महत्वाकांक्षीका साथ अगाडि बढाउने छन्।
किनभने चीनमा पञ्चवर्षीय योजनाले चीन सरकार र चिनियाँ कम्युनिस्ट पार्टीको सफलता अथवा असफलताको मापन निर्धारण गर्छ।
विगत पाँच वर्षमा चीनले अथक प्रयास गरी विभिन्न कठिनाइ र चुनौती पार गरेको छ। कोभिड महामारी र विश्वव्यापी फैलिएको आर्थिक मन्दीको चपेटामा चीन पनि गुज्रिरहेको छ। त्यही भएर पनि बितेको पाँच वर्षलाई सीले निकै कठिन घडी भनेर उल्लेख गरेका छन्।
कठिन र चुनौतीपूर्ण समय भए पनि चीनले समय अगाडि नै लक्ष्य भेटेर विश्वलाई स्थिर र गुणस्तरीय विकास कस्तो हुन्छ भनेर उदाहरण पेस गरेको छ।
सी चिनफिङले भनेका छन्, 'पाँच वर्षको यात्रा साह्रै असामान्य थियो भने उपलब्धिहरू प्राप्त गर्न कठिन थियो। सबैले उत्साहपूर्वक कोशिस र समर्पण गरी समृद्ध चीन बनाएका छन्। मेहनतपूर्वक काम गरेका हरेकलाई म सलाम गर्न चाहन्छु।'
यसको अर्थ के हो भने, चिनियाँ अर्थतन्त्रले निकै कठिन क्षण पार गरिसकेको छ। अबको समय केही सहज हुने र चिनियाँ अर्थतन्त्र थप मजबुत र सुदृढ हुने अनुमान गर्न सकिन्छ।
चिनियाँ नेता सीले शुभकामना सन्देशमा प्राथमिकता दिएको अर्को बुँदा हो चिनियाँ शैलीको आधुनिकीकरण।
विगत पाँच वर्षमा चिनियाँ नेताहरूले औपचारिक तथा अनौपचारिक मञ्चहरूमा बारम्बार दोहोर्याउने पदावली हो चिनियाँ शैलीको आधुनिकीकरण।
आधुनिकीकरण भनेको पश्चिमाकरण होइन भनेर चीनले विश्वलाई बुझाउने कोशिस गरिरहेको छ। धेरै मुलुक र विद्वानहरूले आधुनिकीकरणका नाममा पश्चिमाकरणको अन्धाधुन्द अँगालेको कुरालाई चुनौती दिँदै चीनले चिनियाँ शैलीको आधुनिकीकरणलाई अगाडि ल्याएको छ।
त्यसैले प्रस्ट्याउन चिनियाँ राष्ट्रपति सीले भनेका छन्, 'चीनको कुल आर्थिक मात्राले लगातार नयाँ उचाइमा पुगेर यसै वर्ष १४०० खर्ब युआन पुग्ने अनुमान छ। आर्थिक शक्ति, वैज्ञानिक तथा प्राविधिक शक्ति, रक्षा शक्ति लगायत समग्र शक्तिमा नयाँ छलाङ मारिएको छ। स्वच्छ जल र हरियो पहाड विकासको रंगीन आधार बनेको छ। सर्वसाधारणको प्राप्त अनुभव सुखमय अनुभव र सुरक्षा अनुभव बढ्दै आएको छ।'
यी तथ्यहरू चिनियाँ शैलीको आधुनिकीकरण बुझाउने कडीका रूपमा हेरिन गरिन्छ।
सन् २०२५ लाई स्मरणीय वर्ष भन्दै चीनले ऐतिहासक केही काम गरेर विश्वमा चीनको प्रगति देखाउने काम गरेको सी चिनफिङले भनेका छन्।
गत सेप्टेम्बर ३ मा बेइजिङमा आयोजित सैनिक परेडलाई उल्लेख गर्दै चिनियाँ जनताको जापान विरोधी युद्ध एवम विश्व फासिवाद विरोधी युद्ध विजयको ८० औं वार्षिकोत्सव भव्य रुपमा मनाको र ताइवान पुनरुत्थान स्मरण दिवस स्थापना गरेका भनेका छन्।
चिनियाँहरूलाई इतिहास सम्झन, सहिदको स्मरण गर्न, शान्तिप्रिय हुन र भविष्य निर्माण गर्न प्रोत्साहन गरी चीन राष्ट्रको महान पुनरूत्थानको शक्ति संकलन गरेको भनेर उनले उक्त प्रसंग उद्धृत गरेका हुन्।
चीनले विज्ञान तथा प्रविधि र उद्योगमा फड्को मारेको कुरा पनि उनले शुभकामना सन्देशमा बताएका छन्। नवीन सिर्जनाको उपलब्धि एकपछि अर्को प्राप्त भएको, कृत्रिम बुद्धिमत्ता अर्थात् एआई बिग डेटा समृद्ध रूपमा विकास भएको, चिप्सको स्वअनुसन्धान र विकासले नयाँ प्रगति पाएको भन्दै नवीन सिर्जना शक्तिमा चीन सबभन्दा तीव्र आर्थिक समूहमध्येको एक बनेको घोषणा पनि गरेका छन्।
यही सिलसिलामा उनले केही उदाहरण प्रस्तुत गरेका छन्।
चीनले अन्तरिक्ष अनुसन्धानमा थेन वन नम्बर २ प्रक्षेपण गरेको, ब्रह्मपुत्र तल्लो भागको जल विद्युत परियोजना निर्माण सुरू गरेको, पहिलो विद्युतीय चुम्बकीय प्रक्षेपणयुक्त विमान वाहक जहाज औपचारिक रूपमा सञ्चालनमा ल्याइएको, मानव रोबोटले चिनियाँ कुङफू खेलेर देखाएको, ड्रोन लाइट शो गरिएको भनेर चिनियाँ आविष्कारको प्रशंसा गरेका छन्।
चीनले सन् २०२५ मा सुरू गरेको ब्रह्मपुत्र जलविद्युत परियोजना चर्चित छ। झन्डै ७० हजार मेगावाट क्षमताको यो परियोजनालाई पन्ध्रौं पञ्चवर्षीय योजना अवधिमै सम्पन्न गर्ने चीनले लक्ष्य राखेको छ।
'हामीले संस्कृतिमार्फत भावनालाई सुन्दर बनाएका छौं' भन्दै सांस्कृतिक संग्रहालय, अमूर्त सांस्कृतिक सम्पदाको लोकप्रियता बढ्दै आएको, विश्व सम्पदा सूचीमा अरू पनि सम्पदा थपिएका, चिनियाँ कार्टुन क्यारेक्टर वुखुङ र नचा विश्वव्यापी लोकप्रिय भएका, युवाहरूका आँखामा परम्परागत चिनियाँ संस्कृति सौन्दर्य थपेको पनि उनले औंल्याएका छन्।
चिनियाँ अर्थतन्त्रलाई पछिल्लो समय पर्यटन र मनोरञ्जन उद्योगले धानेको छ भन्दा अत्युक्ति हुँदैन। त्यसैले त नयाँ वर्षको शुभकामना सन्देशमा नेता सीले चीनका सांस्कृतिक पर्यटन बजार भीडभाडमय बनेको, सहर र गाउँमा फुटबल र बास्केटबल प्रतियोगिता अत्यन्तै रमाइलो भएको, बरफ खेलकुदले हिउँदे ऋतुलाई उत्साहित बनाएको उल्लेख गरेका छन्।
परम्परा र आधुनिकताको मिश्रणबाट चिनियाँ संस्कृति अझ उज्यालो र अझ रंगीन बनेको छ।
शुभकामना सन्देशमा उनले केही तथ्यमार्फत चिनियाँ विकासका केही आँखीझ्यालहरू पनि प्रस्तुत गरेका छन्।
गत एक वर्षमा चीनमा नयाँ रोजगारीदरमा वृद्धि भएको जेष्ठ नागरिकहरूलाई सुविधा दिएको, बालबालिका हुर्काउने परिवारलाई हरेक महिना थप ३ सय युआन भत्ता दिएको बताएका छन्।
चीनले अँगाल्दै आएको सुधार र खुलापनलाई अझै मजबुत बनाउने प्रयास स्वरूप चीनले विश्वलाई अरू खुला भएर अँगालेको उदाहरण पनि चिनियाँ राष्ट्रपति सी चिनफिङले व्यक्त गरेका छन्। शाङहाइ सहयोग संगठन थेनचिन शिखर सम्मेलन र विश्व महिला शिखर सम्मेलनको सफलतापूर्वक आयोजना गरिएको भन्दै हाइनान स्वतन्त्र बन्दरगाह करमुक्त बनाइएको कुरालाई उनले जोड दिएका छन्।
चीनले सुधार र खुलापन जोड दिने क्रममा निजी क्षेत्रलाई उत्साहित बनाउँदै आएको छ। चीनको निजी व्यवसायले चीनको ५० प्रतिशतभन्दा बढी कर तिर्छ।
६० प्रतिशत आन्तरिक उत्पादन मात्रा चीनका निजी व्यवसायले ओगटेको छ भने ७० प्रतिशत प्राविधिक सिर्जना उपलब्धि हासिल गरेको छ। यसबाहेक, ८० प्रतिशत सहरी रोजगारी प्रदान पनि निजी क्षेत्रले गरेको छ र चीनको ९० प्रतिशत व्यवसायको संख्या ओगटेको छ।
यी तथ्यांकबाट देखिन्छ, समाजवादी चीनमा निजी व्यवसाय र उद्यमीहरू चिनियाँ शैलीको आधुनिकीकरणको निर्माण गर्ने मुख्य शक्ति बनेका छन्।
केही दिन अगाडि चिनियाँ राष्ट्रिपति सी चिनफिङले बेइजिङमा आयोजित एक समारोहमा भनेका थिए 'चीनको आर्थिक विकासमा चमत्कार सिर्जना गर्ने काममा निजी व्यवसायले ठूलो योगदान दिएका छन्। चीनको निजी अर्थतन्त्रको विकास र निजी उद्यमीको विकासमा उच्च ध्यान दिइएको छ।'
चिनियाँ कम्युनिस्ट पार्टीले पनि निजी व्यवसायलाई समर्थन दिने नीति परिवर्तन नहुने भन्दै निजी अर्थतन्त्र अनिवार्य र यसको उज्यालो भविष्य रहेको दस्ताबेजमा उल्लेख गरेको छ।
यही सिलसिलामा सी चिनफिङले नयाँ वर्षको शुभकामना दिँदा सुधार र खुलापनको निरन्तरताको अडान प्रस्तुत गरेका हुन्। सुधार र खुलापनको मुख्य विषय नै निजी क्षेत्रलाई प्रोत्साहन गर्नु हो। सन् २०२५ को मे २० देखि चीनमा औपचारिक रूपमा 'निजी अर्थतन्त्रलाई प्रवर्द्धन गर्ने कानुन' लागू गरिएको छ।
यो चीनको पहिलो, विशेष गरी निजी अर्थतन्त्रलाई विकास गर्ने आधारभूत कानुन हो। यसले चीनको निजी व्यवसायको विकासमा दीर्घकालीन नियमको प्रत्याभूति प्रदान गरेको छ।
त्यसैगरी शुभकामना सन्देशमा समेटिएको अर्को मुद्दा हो विश्वशान्ति।
शुभकामना सन्देशमा नेता सीले भनेका छन्, 'तीन वटा पहलपछि मैले विश्व शासन पहल प्रस्तुत गरी अझ न्यायिक तथा निष्पक्ष विश्व शासन प्रणालीको निर्माण गर्न अघि सरेको छु। हालै विश्वमा उतारचढाव र केही क्षेत्रमा अझै युद्ध छ। इतिहासको सही पक्षमा उभिएर चीनले विभिन्न मुलुकसँग विश्व शान्ति र पूर्ण विकास एवं मानव जातिको भाग्य समुदायको रचना गर्ने इच्छा लिएको छ।'
पछिल्लो समय ताइवान मुद्दा निकै चर्किरहेको छ। अमेरिकाले ठूलो मात्रामा ताइवानलाई हतियार आपूर्ति गरेपछि चीनले त्यस्ता अमेरिकी कम्पनी र व्यक्तिमाथि प्रतिबन्ध लगाएको छ।
चीनको एकीकरणका सन्दर्भमा उनले भनेका छन्, 'ताइवान जलडमरूका दुई किनारका देशबन्धु एकै परिवारका हुन्। मातृभूमि एकीकरणको ऐतिहासिक प्रवृत्ति अवरूद्ध हुने छैन।'
चीनले ताइवानलाई एकीकरण गर्न सधैं शान्तिपूर्ण बाटो अपनाउने भन्दै आएको छ। जापान र अमेरिकाले ताइवान विषयमा चीनको आन्तरिक मामिलामा हस्तक्षेप गरेको विषयमा चिनियाँ नेता र चिनियाँहरू निकै आक्रोशित देखिन्छन्।
सी चिनफिङले उदाहरण दिँदै भने, 'छोटो समयअघि म राष्ट्रिय खेलकुद उद्घाटन समारोहमा उपस्थित भएको थिएँ। क्वाङतुङ, हङकङ,मकाउ समेत तीन क्षेत्र एकीकृत भएर सँगै हिँडेको देखेर निकै खुसी लागेको छ। एक चीन दुई प्रणाली नीतिको सुदृढ रूपमा पालना गरी हङकङ र मकाउलाई राष्ट्रिय विकासको महान स्थिति अनुकूल दीर्घकालीन समृद्धि र स्थिरता कायम राख्न समर्थन मिलेको छ।'
यही नीति अनुरूप ताइवान फर्काउने चीनको अभिलाशा छ।
चिनियाँ कम्युनिस्ट पार्टीको अनुशासन र विकासमा पनि उनले केही महत्वपूर्ण कुरा बोलेका छन्।
पार्टी विकास भए मात्र देश बलियो हुन सक्छ भन्दै केन्द्रीय समितिका आ ठवटा नियम शिक्षाको गहन रूपमा पालना गरी गहिरो तथा कडा रूपमा पार्टीको शासन र स्वयं क्रान्ति गरेको उनले उल्लेख गरेका छन्।
पार्टी र प्रशासनको शैली र वातावरण राम्रो हुँदै आएको भन्दै प्रारम्भिक उद्देश्य र जिम्मेवारी लिएर लामो समयसम्म अथक प्रयास गरी येनआनको 'गुफा प्रश्न' को उत्तर दिएर जनतालाई सन्तोषजनक नतिजा दिनुपर्ने बताएका छन्।
पल्लो शान्षी प्रान्तमा रहेको येनआनको गुफामा चिनियाँ कम्युनिस्ट पार्टीले सन १९३७ देखि १९४९ सम्म हेडक्वार्टर राखेको थियो। त्यही गुफाबाट नयाँ चीनको चित्र कोरिएकाले उनले इतिहास सम्झाएका हुन्।
शुभकामना सन्देशमा सी चिनफिङले निकै भावुक र क्लासिक भनाइ पनि राखेका छन्। पहाड र समुद्र पार गरेर सपनाको खोजी गर्दा टाढा सोच्नु हुँदैन भन्दै उनले अगाडिको बाटो अप्ठ्यारो भए पनि ठूलो पाइला चाल्नुपर्छ भन्ने भनाइ राखेका छन्।
उनले भनेका छन्, 'घोडा चढ्ने उत्साह, हजारौं घोडा दौडे बराबरको शक्ति र अविच्छिन्न भावना लिएर हामी सपना साकार तुल्याउन प्रयास गरौं र सुखमय जीवनको लागि लडौं। महान इच्छालाई सुन्दर वास्तविकतामा परिणत गरौं।'
आगामी फेब्रुअरी मध्यदेखि चीनमा घोडा वर्ष सुरू हुँदैछ। उनले यही भावना जोडेर चिनियाँहरूलाई उत्साहित बनाएका हुन्।
***
(चेतनाथ आचार्यका अन्य लेखहरू पढ्न यहाँ क्लिक गर्नुहोस्)
-1746009348.jpg)
