नेपाली कांग्रेसले समयमै महाधिवेशन नगरेकोमा नेकपा एमालेका अध्यक्ष केपी शर्मा ओलीले टिप्पणी गरेपछि कांग्रेस प्रवक्ता विश्वप्रकाश शर्माले ओलीलाई तथ्यको ख्याल गर्न भन्दै जवाफ फर्काएका छन्।
शनिबार वडा अधिवेशन भर्चुअल रूपमा उद्घाटन गर्दै ओलीले लोकतान्त्रिक भन्ने कांग्रेसले समयमै अधिवेशनसमेत गर्न नसकेको भन्दै आलोचना गरेका थिए।
आइतबार प्रवक्ता शर्माले कांग्रेसले ५ वर्षभित्र महाधिवेशन गर्न सकेन भन्ने ओलीको आलोचनालाई स्वीकार्य रहेको भन्दै तथ्य हेक्का राख्न पनि आग्रह गरेका छन्।
‘कांग्रेसले ५ वर्षभित्र महाधिवेशन गर्न सकेन भन्ने कमरेड केपी शर्मा ओलीको आलोचना स्वीकार्य,’ उनले ट्वीट गर्दै भनेका छन्, ‘आलोचना गर्दा तथ्यको हेक्का नराख्नु भने लज्जास्पद।’
कांग्रेसले २०७२ फागुनमा १३ औं अधिवेशन गरेको थियो। १४ औं अधिवेशन मंसिर ९ देखि १३ गतेसम्म गर्ने कांग्रेसको तयारी छ।
कांग्रेसले भन्दा एमालेले २० महिना पहिले यसअगाडि अधिवेशन गरेको थियो। एमालेले मंसिरमै दसैं अधिवेशन गर्न लागेको छ।
‘कांग्रेसको ०७२ फागुनमा महाधिवेशन हुनुभन्दा २० महिना अघि एमालेको २०७१ असारमा महाधिवेशन भएको थियो,’ ओलीलाई जवाफ दिँदै शर्माले भनेका छन्, ‘कमरेड, एक औंला यता बाँकी औंला त्यतै!’
संविधानअनुसार राजनीतिक दलले ५ वर्षभित्र महाधिवेशन गरिसक्नुपर्छ। शर्माले अधिवेशन पार्टीको आन्तरिक जीवनको विशेष अध्याय भएको पनि बताएका छन्।
‘अधिवेशन आन्तरिक जीवनको बिशेष अध्याय अनि दलहरूको रुपान्तरण आजको समयको एक महत्त्वपूर्ण कार्यभार होl परिवर्तन दल र राजनीति समग्रतामा जरुरी छ,’ उनले भनेका छन्, ‘दल व्यवस्थापनको नवीन सुत्र र शैली आलोचनाले होइन, आत्मालोचनाले खोजौंl खराबीमा होइन रुपान्तरणमा प्रतिस्पर्धा गरौंl’
कांग्रेसले गत भदौ १८ गतेदेखि वडा अधिवेशन गर्न सुरू गरेको थियो। तर ६४ जिल्लामा मात्रै वडा अधिवेशन सकेको छ।
एमालेले भने शनिबार देशभरका करिब छ हजार वडामा वडा अधिवेशन सकेको र बाँकीमा छिट्टै गरिने बताएको छ।