१० वर्षदेखि करारमा कार्यरत जनशक्तिलाई स्थायी गर्ने त्रिभवन विश्वविद्यालय सिनेटको निर्णयप्रति एमाले विद्यार्थी संगठन अनेराश्ववियुले आपत्ति जनाएको छ।
विश्वविद्यालय आफैंमा एक प्राज्ञिक थलो भएको भन्दै अनेरास्ववियुले प्राध्यापक तथा कर्मचारी नियुक्ति गर्दा सेवा आयोगमार्फत खुल्ला प्रतिस्पर्धा गराउनुपर्ने माग गरेको छ।
‘देश विदेशमा रहेका दक्ष जनशक्तिलाई विश्वविद्यालय सेवामा भित्र्याउने उपाय भनेको नियमित रूपमा त्रिभुवन विश्वविद्यालय सेवा आयोगको परीक्षा गराउनुनै हो,’ अनेरास्ववियु अध्यक्ष सुनिता बरालद्वारा जारी विज्ञप्तिमा भनिएको छ,‘विभिन्न समयमा आंशिक/करारमा नियुक्त प्राध्यापकको ब्यवस्थापन गर्ने नाममा मेरिट र प्रतिस्पर्धाभन्दा बाहिर गएर गरिने कुनै पनि मापदण्ड र विशेष ब्यवस्थाको पक्षमा अनेरास्ववियु नरहेको कुरा जानकारी गराउँछौं।’
यस सम्बन्धमा आफूहरूले मसिंर ९ गते ध्यानाकर्षण पत्रमार्फत असहमति पेश गरेको भन्दै यसलाई लत्याएर त्रि.वि.ले मिति २०७८ मसिंर १४ गतेको सिनेट बैठकमा जबरजस्त रूपमा करार प्राध्यापकलाई स्वतः स्थायी गर्ने अवैज्ञानीक प्रस्ताव पेश गरी निर्णय गर्नु अवैज्ञानिक रहेको अनेरास्ववियुले उल्लेख गरेको छ।
‘हामी त्रिविलाई स्वच्छ, मर्यादित र दक्ष जनसक्ति उत्पादन गर्ने विश्वविध्यालय बनाउन दृढ छौं। तसर्थ यस्ता गलत निर्णयलाई अविलम्ब फिर्ता लिन र खुल्ला प्रतिस्पर्धा मार्फत आवश्यक पूर्ण दरबन्दी परिपूर्ति गर्न त्रिभुवन विश्वविध्यालयसँग जोडदार माग गर्दै विश्वविध्यालयलाई प्राज्ञिक थलो बनाउन सबै सरोकारवाला पक्षहरुसँग सहयोगको लागी हार्दिक अपिल गर्दर्छौ,’ विज्ञप्तिमा भनिएको छ, ‘त्रिविले यस गलत निर्णय नसच्याए हामी चरणवद्द आन्दोलन गर्न बाध्य हुने जानाकारी सहित पहिलो चरणको आन्दोलनको कार्यक्रम अन्तर्गगत १७ गते देशभरका आङ्गिक क्याम्पसका क्याम्पस प्रमुखमार्फत त्रि.वि. कुलपति, सहकुलपति र उपकुलपतिलाई ज्ञापनपत्र बुझाउने कार्यक्रम घोषणा गर्दछौं।’