दाङको निर्वाचन क्षेत्र नं. २ मा नेकपा (माओवादी केन्द्र) ले उपाध्यक्ष तथा पूर्व सभामुख कृष्णबहादुर महरासहित तीन जनाको नाम प्रतिनिधिसभा सदस्य पदका लागि सिफारिस गरेको छ।
नेकपा माओवादी केन्द्र क्षेत्र नं. २ समन्वय समितिको आइतबारको बैठकले पार्टी प्रवक्तासमेत रहेका महराको नाम एक नम्बर सिफारिस गरेको जिल्ला इञ्चार्ज तथा केन्द्रीय सदस्य हेमराज शर्मा (डायमण्ड)ले सेतोपाटीलाई जानकारी दिए।
मंसिर ४ गते हुने प्रतिनिधिसभा सदस्य पदका लागि यो क्षेत्रबाट पूर्व मन्त्री रेखा शर्मा खड्का र निर्मल आचार्यको नाम पनि सिफारिस गरेको उनले बताए।
महरा २०७४ को निर्वाचनमा यहीँ क्षेत्रबाट निर्वाचित भएका थिए। त्यतिखेर यो निर्वाचन क्षेत्र (क) बाट नेकपा एमालेका महासचिव तथा लुम्बिनी प्रदेशका पूर्व मुख्य मन्त्री शंकर पोखरेल निर्वाचित भएका थिए। २०७४ सालमा माओबादी केन्द्र र एमालेका बीचमा साझा बाम गठबन्धन भएको थियो। उनीहरू एउटै घोषणा पत्रमार्फत निर्वाचनमा होमिएका थिए।
यस पटक यहीँ क्षेत्रबाट एमालेले महासचिव पोखरेलको नाम प्रतिनिधि सभा सदस्य पदका लागि एकल रूपमा यसअघि नै सिफारिस गरिसकेको छ। यदि महरा ब्याक नभए यसपटक उनको र पोखरेलका बीच भिडन्त हुने देखिएको छ।