मधेस प्रदेश सरकारको मन्त्रिपरिषद विस्तार गरिएको छ। मुख्यमन्त्री कृष्ण प्रसाद यादवको सिफारिसमा थप दुई जना मन्त्री नियुक्त भएका हुन्।
लोकतान्त्रिक समाजवादी पार्टी (लोसपा) बाट रानीकुमारी तिवारी र नेकपा माओवादी केन्द्रबाट जवाहरलाल कुशवाहा मन्त्री बनेका छन्।
उनीहरूलाई क्रमशः शिक्षा तथा संस्कृति मन्त्रालय र ऊर्जा, सिँचाइ तथा खानेपानी मन्त्रालयको जिम्मेवारी दिइएको छ।
प्रदेश प्रमुख सुरेन्द्र लाभ कर्णले दुवै मन्त्रीलाई पद तथा गोपनीयताको शपथ ग्रहण गराएको प्रदेश प्रमुखको कार्यालयका निमित्त सचिव शत्रुधन यादवले जानकारी दिए।
रानीकुमारी तिवारी यसअघि पूर्व मुख्यमन्त्री सतीशकुमार सिंह नेतृत्वको सरकारमा पनि शिक्षा तथा संस्कृति मन्त्री थिइन्।
यससँगै मधेस प्रदेश सरकारको मन्त्रिपरिषद ६ सदस्यीय बनेको छ। सरकारमा कांग्रेसबाट मुख्यमन्त्रीसहित दुई जना, नेकपा एकीकृत समाजवादी, जनमत पार्टी, लोसपा र माओवादी केन्द्रका एक–एक जना सहभागी छन्।
यही मंसिर २१ बिनाविभागीय मन्त्रीमा नियुक्त भई शपथ लिएका दुई मन्त्रीलाई पनि मन्त्रालयको जिम्मेवारी दिइएको छ।
कांग्रेसबाट मन्त्री बनेका जंगीलाल रायलाई स्वास्थ्य तथा जनसंख्या मन्त्रालय र नेपाल कम्युनिस्ट पार्टी एकीकृत समाजवादी (नेकपा एस) का कनिश पटेललाई उद्योग, वाणिज्य तथा पर्यटन मन्त्रालयको जिम्मेवारी दिइएको छ।
जनमत पार्टीका संसदीय दलका नेता महेशप्रसाद यादवलाई यसअघि नै अर्थ मन्त्रालयको जिम्मेवारी दिइएको थियो।
सोमबार बिहान बसेको सातदलीय गठबन्धनको बैठकले सरकार विस्तार तथा मन्त्रालय बाँडफाँटको टुंगो लगाएको थियो।
-1746009348.jpg)
