राष्ट्रपति रामचन्द्र पौडेलको राजनीतिक सल्लाहकार सुनिल थापाले पदबाट राजीनामा दिएका छन्।
सक्रिय राजनीतिमा क्रियाशील रहने उद्देश्यले उनले राष्ट्रपतिको विज्ञ सल्लाहकारबाट राजीनामा दिएका हुन्।
सेतोपाटीसँग कुराकानी गर्दै थापाले आफूले केही दिनअघि नै राष्ट्रपतिसमक्ष राजीनामा पेस गरी स्वीकृतसमेत भइसकेको बताए।
‘मैले राष्ट्रपतिसमक्ष राजीनामा बुझाएको हो, स्वीकृत पनि भइसकेको अवस्था छ,’ उनले भने, ‘पार्टीको महाधिवेशन आउँदैछ, त्यसैले पार्टीमै क्रियाशील रहने निर्णयमा पुगेँ।’
२०७९ चैत १६ गते थापालाई राष्ट्रपतिले सल्लाहकारमा नियुक्त गरेका थिए। त्यस बेला थापा नेपाली कांग्रेसको केन्द्रीय कार्यसम्पादन समिति सदस्य थिए।
-1746009348.jpg)
