राष्ट्रिय प्रजातन्त्र पार्टी (राप्रपा) ले पटक-पटक पार्टीबाट अवसर पाएकाहरूलाई यसपालि समानुपातिकतर्फ उम्मेदवार नबनाउने तयारी गरेको छ।
अध्यक्ष राजेन्द्र लिङ्देनको अध्यक्षतामा आइतबार बसेको संसदीय समिति बैठकले २०६४ सालपछि पटक पटक अवसर पाएकाहरूलाई अब समानुपातिकतर्फ उम्मेदवार नबनाउने नीति लिने निर्णय गरेको एक पदाधिकारीले सेतोपाटीलाई जानकारी दिए।
यो समितिमा पूर्वअध्यक्षहरू पशुपति शम्शेर राणा, प्रकाशचन्द्र लोहनीलगायत उपस्थित थिए।
साथै संसदीय समितिले सबै जिल्लालाई उम्मेदवार सिफारिस गरी पठाउन निर्देशन दिएको छ।
ती पदाधिकारीका अनुसार राप्रपा सचिवालयले सबै जिल्ला कार्यसमितिलाई प्रतिनिधि सभा प्रत्यक्ष र समानुपातिकतर्फ आकांक्षी उम्मेदवारको नाम सिफारिस गरी पठाउन परिपत्र गरेको हो।
राप्रपाले २०७९ को निर्वाचनमा पनि यस्तै निर्णय गरेको थियो तर कार्यान्वयन गर्न सकेन।
पूर्वअध्यक्ष पशुपति शमशेर जबरा र वरिष्ठ नेता बुद्धिमान तामाङ लगायतले समानुपातिक सूचीमा रुची देखाएपछि अर्को निर्वाचनमा बाध्यकारी बनाउने सहमति भएको ती पदाधिकारीको भनाइ छ।
यसअघि अवसर नपाएका तर पार्टीमा योगदान दिएकालाई समेटेर राप्रपा आमचुनावमा जाने तयारी गरेको छ।
-1746009348.jpg)
