सुनकाण्डमाथि थुनछेक बहस सकियो, आजै आदेश हुन सक्ने

सेतोपाटी संवाददाता

काठमाडौं, जेठ ८

तस्करीको ३३ किलो सुनकाण्ड र सनम शाक्य हत्याकाण्डका अभियुक्तबारे थुनछेक बहस सकिएको छ।

जिल्ला अदालत मोरङका न्यायाधीश नारायणप्रसाद शर्माको इजलासमा ११ दिनअघि चलेको बहस मंगलबार सकिएको हो।

तस्करीको ३३ किलो सुन र सनम शाक्य हत्या प्रकरणको छानविन गर्न बनेको समितिले २०७० सालयता चुणामणि उप्रेतीको समूहले झन्डै ३८ क्विन्टल (३७ लाख ९९ हजार ५ सय ५९ ग्राम) सुन तस्करीमार्फत् नेपाल भित्रिएको निष्कर्ष निकालेको थियो।

यही निष्कर्षका आधारमा जिल्ला सरकारी वकिलको कार्यालले ९ प्रहरीसहित ६३ जनाविरुद्ध मोरङ अदालतमा मुद्दा दायर गरेको थियो। उनीहरूसँग १७ अर्ब १ करोड ८० लाख ७१ हजार ४१३ रुपैयाँ ९० पैसाको बिगो माग गरिएको छ।

जिल्ला सरकारी वकिलको कार्यालयले बुधबार जिल्ला अदालत मोरङमा दायर गरेको मुद्दाको अभियोगपत्रमा चुडामणि उप्रेती ‘गोरे’ को समूहले मात्र यो झण्डै ३८ क्विण्टल सुन तस्करी गरेको उल्लेख छ।

प्रहरीले पक्राउ गरी अदालत पुर्‍याएका ३२ अभियुक्तलाई थुनामा राखेर मुद्दाको सुनुवाइ गर्ने की धरौटी वा तारेखमा राखेर मुद्दाको सुनुवाइ गर्ने? भन्ने बहस मंगलबार सकिएको हो। जिल्ला अदालत मोरङले आज आदेश आउन सक्ने जनाएको छ।

'थुनछेक बहस सकियो। अभियुक्तहरूलाई थुनामा राख्ने, धरौटी वा तारेखमा राखेर मुद्दाको पुर्पक्ष गर्ने भन्ने विषयमा आजै आदेश आउँछ भन्ने अहिलेसम्मको अनुमान छ,' एक कर्मचारीले भने।

यो प्रकरणका मुख्य अभियुक्त गोरेलाई पनि आजै काठमाडौंमा पक्राउ गरिएको छ। उनलाई पनि मोरङ अदालतमै हाजिर गराउन लगिँदै छ।

प्रकाशित मिति: मंगलबार, जेठ ८, २०७५ ०५:३७

सिफारिस