रेडियो नेपालको खुमलटारमा रहेको ४२ रोपनी जग्गा नेपाल दूरसञ्चार प्राधिकरणले प्रयोग गर्ने बाटो खुला भएको छ।
फागुन २८ गते सरकारले जग्गा प्राधिकरणलाई उपलब्ध गराउने निर्णय भए पनि अहिलेसम्म कार्यान्वयनमा आएको थिएन।
रेडियो प्रसार सेवा विकास समिति रेडियो नेपालले जग्गा कुँवेर ज्ञान हाउजिङलाई भाडामा दिएको थियो।
समितिले मंगलबार गोरखापत्रमा सूचना निकालेर हाउजिङसँग भएको सम्झौता रद्द गरिदिएसँगै दूरसञ्चार प्राधिकरणले सो जग्गा प्रयोग गर्न पाउने भएको हो।
‘खुमलटार रेडियो प्रसारण केन्द्रस्थित साविक ललितपुर उपमहानगरपालिका वडा नम्बर ५ को कित्ता नम्बर २४७ समेतको ४२ रोपनी जग्गा मिति २०७४ कात्तिक २६ को सम्झौताबमोजिम जग्गा भाडामा लिने कुँवेर ज्ञान हाउजिङ कम्पनी प्रालिले हालसम्म जग्गा प्रयोग नगरी खाली नै रहेको थियो,’ सूचनामा भनिएको छ, ‘कम्पनीबाट समितिलाई भाडावापत कुनै रकम प्राप्त भएको छैन।’
सरकारले नै जग्गा दूरसञ्चार प्राधिकरणलाई दिइसकेकोले भाडा सम्झौता रद्द गरिएको हो।
‘२०७५ फागुन २८ गतेको निर्णयअनुसार नेपाल दूरसञ्चार प्राधिकरणलाई जग्गा उपलब्ध गराउने भनी सञ्चार तथा सूचना प्रविधि मन्त्रालयबाट पत्र प्राप्त भएकोले कम्पनीसँग भाडा सम्झौता रद्द गरिएको,’ सूचनामा उल्लेख छ।
-1746009348.jpg)
