सिंगापुरमा रहेका प्रधानमन्त्री केपी शर्मा ओलीको नेसनल युनिभर्सिटी अस्पतालमा उपचार सुरू भएको छ।
शरीरमा रहेको रगत फिल्टर गर्ने काम 'प्लाज्माफेरेसिस’ शुक्रबारदेखि नै सुरू गरिएको छ।
'प्लाज्माफेरेसिस’ सुरू भएको र यो प्रकृया अझै केही पटक गरिने प्रधानमन्त्रीका निजी चिकित्सक डाक्टर दिब्या सिंह शाहले जानकारी गराएको प्रधानमन्त्रीका प्रमुख राजनीतिक सल्लाहकार विष्णु रिमालले बताएका छन्।
उनका अनुसार प्रधानमन्त्री ओलीको स्वास्थ्य अवस्था सामान्य छ।
के हो प्लाज्माफेरेसिस?
प्लाज्माफेरेसिस भनेको रगतमा रहेको प्लाज्मा छानेर हटाउने प्रकृया हो। रगतमा रहेको पारदर्शी वस्तु हो प्लाज्मा। यसले रेड सेल, ह्वाइट सेल, प्लेटलेट्स र ब्याक्टेरिया, भाइरससँग लड्ने ‘एन्टिबडी’ बोक्ने गर्छ।
प्रधानमन्त्रीलाई किन गर्नु परेको प्लाज्माफेरेसिस ?
प्रधानमन्त्री ओलीको दुवै मिर्गौला बिग्रिएर १२ वर्षअघि मिर्गौला फेरेको हो। ओलीकी बुहारीले उनलाई एउटा मिर्गौला दान दिएकी थिइन्।
शरीरमा अर्को मानिसको मिर्गौला आएपछि बाह्य वस्तुसँग लड्ने ‘एन्टिबडी’ले सो मिर्गौलालाई पनि कुनै हानिकारक वस्तु शरीरमा आएको ठान्छ। त्यसपछि मिर्गौलालाई मार्न आक्रमण गर्न थाल्छ।
मिर्गौलालाई धेरै हानी नपुगोस् भनेर डाक्टरहरूले औषधिमार्फत् एन्टिबडीलाई कमजोर बनाएर राख्छन्। तर एन्टिबडीलाई पूरै कमजोर पार्न पनि सकिन्न।
किनभने शरीरमा प्रवेश गर्ने अरु भाइरस, ब्याक्टेरिया लगायतका हानिकारक तत्वसँग लड्ने पनि एन्टिबडीले नै हो।
पछिल्लो १२ वर्षमा एन्टिबडीको आक्रमणबाट प्रधानमन्त्रीको मिर्गौला कमजोर भएको छ। त्यसैले मिर्गौलाले राम्ररी काम गर्न छाडेको छ।
प्लाज्माफेरेसिसबाट रगतको प्लाज्मालाई छानेर निकालिन्छ। प्लाज्माले नै एन्टिबडी बोक्ने हुनाले यो एन्टिबडी पनि प्लाज्मासँगै बाहिर जान्छ।
यसपालि प्रधानमन्त्रीलाई गरिएको प्लाज्माफेरेसिस कति प्रभावकारी हुन्छ, त्यो अबको १५ दिनमा थाहा हुने मिर्गौला रोग विशेषज्ञ ऋषिकुमार काफ्लेले सेतोपाटीलाई बताए।
'यो विधि प्रभावकारी भयो भने त्यसले आउने केही वर्ष काम गर्नेछ,’ काफ्लेले भने, ‘ प्रभावकारी भएन भने प्रधानमन्त्रीलाई फेरि मिर्गौला प्रत्यारोपण गर्नुपर्ने हुनसक्छ।’
यो पनि :
आवश्यक परे प्रधानमन्त्रीको मिर्गौला फेरि फेर्न मिल्छ
